BARANGAY ALLOWANCE WALA WAD-A

MGA TAGA ERMITA, GAWAS SA MGA BASURERO, MAO RAY GIKUHAAN

Patay ang usa ka motorista human maigo sa pagkatumba sa lamp post sa dihang nabangga ang usa ka container van atol sa aksidente sa may intersection sa dalan DM Cortes ug UN Avenue paingon sa Marcelo Fernan Bridge, dakbayan sa Mandaue pasado alas 3 kagahapon sa hapon.

Wa makalikay sa aksidente si Robert Borlasa, taga Sitio Kalubian, Brgy. Yati, lungsod sa Liloan.

Alas 3:57 p.m. kagahapon, si Borloza naghunong sa may intersection samtang naghuwat sa go-signal paingon sa Mandaue sa dihang usa ka prime mover nga may kargang container van ang natumba human kini miliko paingon sa UN Avenue.

Nabuwag

Matod sa pangulo sa Traffic Enforcement Agency of Mandaue (TEAM) Glenn Antigua nga natuwad ang container van ug nabuwag sa prime mover nga gidrayban ni Joser Potayre.

Sa pagkatuwad sa van, naigo niini ang lamp post sa may center island nga nabali ug didto nipaingon kang Borloza.

Sumala pa ni Antigua nga na-ulo pag-igo sa poste si Borloza maong gidala kini dayon sa tambalanan.

Laing naamong

Si Jessie Perez sa City Social Welfare Services Office (CSWS) niingon nga nadala sa Mandaue City District Hospital ang biktima mga alas 4 sa hapon apan gideklarar kining wa nay kinabuhi mga alas 4:40 sa hapon.

Dugang pa ni Antigua nga gawas sa motor ni Borloza, guba ang windshield sa taxi ug laing prime mover.