Luigi miawhag sa mga kawani nga magtinabangay
Giawhag ni Mayor Luigi Quisumbing ang tanang kawani sa Mandaue City Hall nga magtibangay sa paghatag ug maayong serbisyo sa katawhan alang sa kaugmaon sa sunod henerasyon.
Dako usab ang pasalamat sa mayor sa dedikasyon sa mga kawani sa City hall sa ilang mga trabaho.
Kini maoy unod sa pakigpulong sa mayor atubangan sa dul-an 3,000 ka mga kawani sa City hall didto sa Mandaue City Sports and Cultural Complex kagahapon sa buntag.
Si Quisumbing sa iyang pakigpulong naglantaw nga ang problemang nasinati sa dakbayan karon di na unta masinati pa sa mga sunod nga henerasyon.
Atol sa pagsaulog sa ika-48 nga Charter Day sa pagka-dakbayan sa Mandaue kagahapon, gipasidunggan usab sa kagamhanan ang mga kawani sa City hall sa nagkadaiyang departamento ug barangay nga nipakita og katakos sa ilang pagserbisyo.
Duha ka kawani sa clean and green ug duha ka mga job-order nga kawani ang gihatagan og special recognition sa ilang pagkamatinud-anon human niuli sa gamit nga ilang nakit-an nga gipanag-iya sa laing tawo.
Mga tinun-ang atleta nga nipakita og katakos sa ilang tagsa-tagsa ka paugnat sa kusog sa lokal ug international nga kompetisyon ang lakip sa gipasidunggan uban sa mga tunghaan ug mga topnotcher sa Licensure Examination for Teachers (LET) ang gipasidunggan usab sa City hall.
Atol sa programa kagahapon sa buntag, di mominos sa 127 ka mga kawani sa nagkadaiyang departamento ang gipasidunggan sa ilang maayong serbisyo nga gidalit sa City hall ug publiko.