‘SAKOP’ NI BAROK SA DANAO NASIKOP

BRGY. KONSEHAL SA DANAO CITY APIL SA DRUG LIST NI DUTERTE

Babayeng barangay konsehal nasikop human nakuhaan og binultong shabu atol sa buy bust operation sa gabii sa Agosto 30 sa Brgy. Tuburan Sur, dakbayan sa Danao.

Ang opisyal naa sa listahan sa narco-politics ni Presidente Rodrigo Duterte.

Si barangay konsehal Thelma Sekiguchi sa nahisgutang lugar nasikop sa joint operations sa Danao Police Station, Provincial Intelligence Branch PIB-CPPO ug Regional Intelligence Division (RID 7).

Si Chief Inspector Gerald Ace Pelare, hepe sa Danao Police Station nga nahinabi sa Superbalita Cebu, nagkanayon nga gipalitan nilag usa ka bultong shabu nga mobalor og P12,000 si Sekiguchi, hinungdan nga ilang napusasan.

Nakuha tanan sa buy bust operation ang 21 ka gagmayng putos sa shabu lakip sa gi-order nga drugas.

Si Pelare niingon nga human nila ma buy-bust gisunod nila gilayon ang pagpatuman sa search warrant sa panimalay niini.

Ang search warrant giisyu ni Executive judge Jerry Dicdican sa Regional Trial Court Branch 25 sa dakbayan sa Danao.

Matod pa ni Pelare nga si Sekiguchi high value target level 2 sa provincial level diin nalakip kini sa listahan ni Duterte.

Nakuha nila sa balay sa konsehal ang 10 ka medium nga putos sa shabu, laing 18 ka gagmay nga putos sa shabu, motimbang sa 50.9 gramos nga mobalor og P614,000, timbangan ug mga gamit sa pagsuyop sa drugas.

Gibutyag ni Pelare nga ang konsehal sakop sa drug lord nga si Alvaro Alvaro, alyas Barok.

Sumala pa ni Pelare nga ang konsehal usa sa mga bigtime nga drug personality sa Probinsiya sa Sugbo. /