TEAM RAMA MAHIMO NA NGA MAYORIYA?

Dakong kawad-on si Konsehal Hanz Abella sa Bando Osmeña Pundok Kauswagan ug sa Cebu City Government sa higayon nga iya nang biyaan ang iyang katungdanan aron dawaton ang pagka commissioner sa 7th Division sa National Labor Relation Commission (NLRC).

Mao kini ang sulti ni Mayor Tomas Osmeña, kansang grupo bag-ohay lang nakakuha sa majority bloc sa City Council niadtong Hulyo 3 human nibalhin si Konsehal Jerry Guardo sa Bando Osmeña Pundok Kauswagan (BOPK) nasagmuyo sa maong balita.

“Bad, bad for us but people have to realize it’s bad for the city because Team Rama (councilors) will block our projects,” matod ni Osmeña.

Si Abella, sa iyang bahin, nagkanayon nga sa higyaon nga madawat na niya ang opisyal nga appointment nga pinirmahan

ni Presidente Rodrigo Duterte, mo-resign siya isip konsehal sa south district aron mosugod sa iyang bag-ong trabaho.

Sa kasamtangan, adunay siyam ka mga konsehal nga sakop sa BOPK samtang walo ang Team Rama.

Sa higayon nga wa na si Abella, parehong adunay walo ka konsehal ang duha ka grupo.

Ubos sa balaod, ang partido sa konsehal diin siya nagpapili atol sa eleksyon maoy mo-nominate og tulo ka ngan ngadto sa Malacañang.

Sa habig ni Abella, ang United Nationalist Alliance (UNA) ni kanhi bise presidente Jejomar Binay diin ilang alyado ang Team Rama ni kanhi Mayor Michael Rama ang adunay gahom sa pagpili.

Sila si Konsehal Joel Garganera, Raymond Garcia, Joey Daluz III, Pastor Alcover Jr. ug Joy Pesquera nagkanayon nga kinahanglan magagikan sa ilang grupo sa 2016 elections sa south district.

Ilang gipasabot si Renato Osmeña Jr., igsuon ni kanhi Konsehal Richard Osmeña ug si Kapitan Lotlot Ignacio sa barangay Inayawan.

Wala nila mabutyag si Kapitan Phillip Zafra sa barangay Tisa kinsa maoy presidente sa Association of Barangay Council (ABC) nga maoy ex-officio member sa konseho nga maoy giingon ni Konsehal Dave Tumulak nga maoy mohulip sa katungdanan nga biyaan ni Abella.

Si Garganera niklaro nga di tinuod ang pasangil ni Osmeña nga sila maoy babag’ diha sa konseho sanglit ang mga proyekto niini ilang gisuportahan lakip na ang Bus Rapid Transit (BRT) apan aduna lang silay sugyot.

Matod sa Team Rama nga kon adunay delicadeza ang BOPK, modeklarar sila og vacancy sa Konseho. /