Modus sa V-hire nabisto

Giingon nga modus karon sa mga driver kining pagbalhin sa pasahero gikan sa usa ka V-hire paingon sa kolurom nga van.

Mao kini ang nahitabo sa usa sa mga miyembro sa media sa Sugbo nga si Gregg Rubio.

Matod ni Rubio ug base sa iyang kasinatian nga niadtong Miyerkules dihang paingon siya sa dakbayan sa Sugbo gikan sa lungsod sa Daanbantayan, nisakay siya og van nga wala’y nakatatak nga nagpamatuod nga aduna kini’y prangkisa.

Dihang naabot sila sa usa ka gasolinahan sa Barangay Umapad, Mandaue City, gipakanaog sila ug gipabalhin sa usa ka v-hire nga ang operator GT Express Air.

“Hasol kaayo sa pasahero ilabi na kon naay bagahe,” tipik sa post ni Rubio sa social networking site nga Facebook.

“So ang marked GT Express mao’y mo pick-up passengers sa North Bus Terminal, then at the Shell Station magbayloay sila pasahero sa colorum then mobalik ang GT to terminal with the passengers nga gikan sa colorum.”

Aduna’y plate number nga ABN 5276 ang aduna’y tatak nga GT Express samtang way tatak ang VK 6271.

Gibutyag usab ni Rubio nga aduna’y lain nga binayloay sa pasahero sa Barangay Tipolo, Mandaue kon paingon na usab ka sa amihanang bahin sa Sugbo.

Si LTO 7 Regional dDrector Alita Pulta, nagkanayon nga padalhan nila og subpoena ang driver ug operator sa nalambigit nga van aron patubagon sa giingong modus.

Samtang si assistant regional director sa Land Transportation Franchising and Regulatory Board (LTFRB) 7 Reynaldo Elnar nibutyag sa Superbalita Cebu nga nakadawat na sila tulo ka semana ang nakalabay sa susamang reklamo.

Dugang niini nga atol sa pagbisita sa ilang inspektor sa maong gasoline station, nakasibat na ang maong mga van.

Gipasabot ni Elnar nga kolurom nga maisip kining van nga wala’y case number ug namasahero bisan paman og tourist van kini.

Anaa’y P200,000 nga multa ang matag van nga mapamatud-an nga kolurom.