Biz permit di na kada tuig

Di na unya kinahanglan nga magbag-o matag tuig sa ilang business permit ang mga magpapatigayon sa dakbayan sa Sugbo.

Kini ang gibutyag ni Mayor Tomas Osmeña nga iyang ipatuman sa iyang administrasyon alang sa paspas nga pagkolekta sa buhis ug hamugaway alang sa mga negusyante.

Matod ni Osmeña nga kadtong bag-ong nag-abli og patigayon, molukat gihapon sila og business permit ug mobayad og buhis.

Samtang wa pa sila makakumpleto sa tanang mga rekisito para sa business permit, mamahimo silang makaabli sa ilang negusyo ug humanon og lukat ang mga papelis sulod sa tulo ka tuig.

Dugang sa mayor nga mamahimo usab nga motanyag ang City Government sa ilang serbisyo sa mga negusyante nga ang Siyudad maoy molukat sa mga dokumento sa lainlaing ahensiya sa gobiyerno bugti sa kantidad nga ipabayad sa siyudad.

Kadtong nakalukat na og business permit, mobayad na lang sila sa ilang buhis base sa gross income sa ilang negusyo.

“I’m trying to tell the treasurer , even the business is illegal you collect taxes. Basta naa silay business you collect taxes,” pasabot ni Osmeña.

Gipasabot sa mayor nga wa siyay labot sa ubang ahensya ug sila na ang mangita og paagi sa pagkolekta sa buhis nga lugar sa ilang buhatan.

Gipadayag niya nga problema na sa kapulisan ang pagsumpo sa ilang binuhatan nga nasupak sa balaod.