Sun LTE gilusad sa Sugbo
Human sa unang hugna sa upgrade sa internet connection sa Sugbo alang sa Smart ug Talk 'N Text subscribers, LTE capable na usab ang Sun Cellular sa Sugbo. Giklaro ni Ramon Isberto, head sa Public Affairs Group sa Smart Communications Inc., nga kinahanglan nga LTE capable na ang sim ug ang cellphone aron ma-enjoy ang upgrade sa data connection. Kagahapon, usa ka formal launching ang gihimo sa Sun Cellular diin nagtanyag usab kini sa tanang subscriber sa Sugbo nga pailisan ilang kasamtangan nga sim ngadto sa LTE capable nga bag-ong sim apan pareho nga numero.
Matod ni Isberto, libre kini nga serbisyo nga ilang ihatag alang sa mga subscriber apan kinahanglan sila mobisita sa Sun Store aron mailisan kini.
Padayon sila nga magpalapad sa ilang LTE network availability sa Sugbo diin nagsugod sila niadtong 2016 alang sa Metro Cebu.
Mas paladpan pa unya nila ang LTE coverage sa tulo ka network sa mga dakbayan ug lungsod sa Alcantara, Alcoy, Aloguinsan, Argao, Asturias, Balamban, Barili, Bogo City, Boljoon, Borbon, Carcar City, Catmon, Cebu City, Compostela, Daanbantayan, Dalaguete, Danao City, Dumanjug, LapuLapu City, Mandaue City, Medellin, Moalboal, Naga, Oslob, Pilar, Pinamungahan, Ronda, San Fernando, Sibonga, Tabogon ug Toledo City.
Aduna'y hiniusa nga 3.4 milyones ka mga subcriber ang tulo ka network diin 1.8 milyon niini ang Sun Cellular. Naay 70-80 porsyento sa subcribers 2G pa ang sim. Kini nagpasabot nga dili pa sila maka- access sa bisan 3G nga connection ug bisan sa mas 10 mbps nga gipaspason niini nga LTE diin maabot ang gipaspason niini sa 15-20 mbps.
Plano na usab karon sa Smart nga mas palapdan pa ang paspas nga internet connection sa mga tourist destination sa Sugbo.