USA KA ADLAW SA HANOI, VIETNAM
Ang Hanoi maoy usa sa mga giisip nga “culture capital” sa nasud sa Vietnam.
Kun mibisita kamo sa dapit, di kamo mahutdan og mga kalihokan ug mga talan-awon nga bisitahon didto. Gikan sa mga museo ug pagkaonan, nagbaha ang ikatanyag sa dapit. Apan unsa may imong mabuhat sa lugar sud lang sa usa ka adlaw?
Ani-a ang listahan ning manunulat sa mga angayang suwayan, tan-awon ug tilawan sa Hanoi.
Temple of Literature
Giisip nga usa sa mga pinakanindot nga attraksyon sa dapit, ang Temple of Literature natukod niadtong 1070 isip pahinungod ni Confucius, sa mga scholars ug sages. Ang edipisyo kanhi puy-anan sa Hari ug Rayna. Makita usab ninyo sa dapit ang mga biniyaan sa mga prominenteng pamilya nga nagpuyo dinhi kaniadto.
Matod sa guide, bugtong mga aristocrato, adunahan ug miyembro sa royal family ang makasud sa unibersidad niadto sa wa pa giablihan ang pultahan niini sa mga yanong tawo. Isipon kang usa ka bayani niadto kon mapasar nimo ang exam nga hinimo sa hari. Tungod sa kalisod sa exam, wa kaabot sa lima ka tawo ang nakapasar niini sa kasaysayan sa unibersidad. Ang ngalan sa malampusong graduate makulit sa mga bato nga gibutang sa bato nga bao dinhi. Sapagkakaron, dagsaon di lang mga turista ang Temple of Literature apan lakip na sa mga tinun-an nga mag-ampo kon aduna silay mga dagkong test nga buhaton.
Hoan Kiem Lake (Turtle Lake)
Kini ang sentro nga lugar sa Hanoi. Sikat usab kini nga laaganan sa tibuok adlaw di lang sa mga lokal apan lakip na sa langyaw nga turista. Nagtungtung sa lawa ang Ngoc Son Temple nga maabot pinaagi sa Huc Bridge o Rising Sun Bridge. Libre ang pagbisita sa lawa apan adunay bayad ang templo. Daghan kang makita nga mga jogger, nagpraktis og Tai Chi kilid sa lawa kon adlawan. Suruyanan usab kini sa mga tawo matag gabii. Ayaw palabya ang pagtilaw sa ilang mga street food ug ice cream kilid sa Hoan Kiem matag gabii.
Hoa Lo Prison Museum / Maison Centrale
Kini maoy giisip nga makasasayanong edipisyo sa Hanoi. Halos natang exhibits dinhi nagpakita sa mga kasinatian sa mga piniriso dinhi niadtong mga 1950s sa dihang ang Vietnam padayong nakigbatok sa kagawasan sa France. Gipakita sa museo ang mga brutal nga pamaagi sa pagtrato sa mga piniriso niini.Gitukod kini sa mga Pranses niadtong 1896 alang sa 450 ka piniriso apan nasuta sa record niadtong 1930s nga moabot sa 2000 ka piniriso ang nasud dinhi.
Hanoi Old Quarter
Daghan kang makitang edipisyo sa Hanoi nga biniyaan human sa pagpanakop France. Ang labing sikat nga distrito sa dapit mao ang Ba Dinh District (Franch Quarter) diin makita ang buhatan sa gobyerno ug ang Hoan Kiem District (Old Quarter), ang nag-unang destinasyon sa mga turista ug mao pud ang
business hub. Daghang mga sidewalk vendor sa Old District ug bagang huot sa trapiko ug nagsugwak nga mga motor ang makita nimo kon mohuot ang trapiko.
Sa kinatibukan-an, malakaw ra nimo ang mga landmark, museo, mga daang edipisyo, war memorial ug uban pang mga talan-awon nga anaa sa Hanoi. Gawas sa mga nalista ning artikulo, pipila sa mga sikat nga talan-awon sa dapit mao ang ilang Opera House, Saint Joseph Cathedral, One Pillar Pagoda ug ang Ho Chi Minh Mausoleum.
Food tip
Daghang mga lamiang pagkaon ang mahimo nimung tilawan sa Hanoi. Apan ayaw kalimti ang pagtilaw sa ilang nabantog nga pho noodles nga paresan og guisadong utan o kan-on. Mas lami ang beef pho noodles sa kilid-kilid nga sakto pagkatimpla sa sili ilabi na kon imu kini paresan og beer. /