Nganong usbon man gyud?

Usa ka balaodnon ang napasar na sa Ubos Balay Balauranan nga mag-usab sa adlaw sa tingtrabaho gikan sa lima o unom ka adlaw matag semana ngadto na lang sa upat. Ang House Bill 6152 napasar na sa House of Representatives ug ang version na lang sa Senado ang gihuwat aron mahimo nang balaod.

Ang rason sa mga nangamahan niini nga himoon na lang upat ka adlaw ang tingtrabaho aron molambo ang competitiveness sa mga trabahante ug mapadali ang ilang pagserbisyo kay humanon naman lang kini sulod sa upat adlaw. Usa pod sa tumong mao ang pagpaluag sa dagan sa trapiko sa mga urban areas sama sa kauluhan ug dinhi sa Sugbo nga grabe na kahuot ang trapiko. So, kon mapasar kini, tulo ka adlaw na ang pahuway sa mga trabahante.

Ambot nganong usbon pa ning adlaw sa tingtrabaho nga dugay na nato kining gisagop. Anaa sa atong Labor Code nga ang empleyado motrabaho og 48 oras sa semana. Kanang maong working hours magdepende sa employers kon himuon ba nga lima o unom ka adlaw ang ilang ipatrabaho sa ilang mga empliyado.

So, kon himuon na kini nga upat ka adlaw, mamahimo nang motrabaho ang mga empleyado og napulo ngadto sa dose oras inay sa kasamtangang otso oras lang. Posibleng mo- report sila sa ilang trabaho gikan sa alas otso sa buntag hangtod na sa alas 6 o alas 8 sa gabii. Kaya pa kaha sa ener�y sa mga empleyado kining maong oras? Adunay mga kompaniya nga applicable kining maong sistema. Apan sa uban dili.

Labi pa kanang anaa sa manufacturing business nga adunay production o orders nga giapas sama anang mga establisemento diha sa Mactan Export Processing Zones. Masuko man gani ang management sa maong mga kompaniya kon daghan ang holidays kay mapagan ang ilang production. Kanang mga sales ladies sa mga shopping malls pabarugon nimo og 12 oras nga naka- high heels pa. Okey lang sa mga empleyado sa gobiyerno kay wala man na sila kaayo trabaho. Ambot nganong usbon pa man gyud nga okey naman ning kasamtangang set up.