Nganong nahadlok

Matod sa National Police Commission (Napolcom), miminos ang nangreklamo batok sa mga pulis karong tuiga. Duna silay pagduda nga hayan nangahadlok ang mga reklamante tungod kay suportado sa kagamhanan ang kampanya batok sa illegal drugs. Mao ni ang pagtan-aw bitaw karon sa publiko tungod sa way puas nga anti drug operations sa kapulisan, diin liboan na ang nangamatay.

Natural ang mahadlok sa mga awtoridad bisan kon duna pay garantiya gikan sa ubang mga buhatan sa kagamhanan, sama sa Napolcom ug Commission on Human Rights (CHR).

Tungod usab kini sa nanglabay nga katuigan nga sayon rang nakatabon ang mga pulis sa ilang mga kalapasan pinaagi sa pagpanghulga ug kon di madala, ari sa kwarta ipaagi.

Mao bitaw ni ang rason kon nganong dunay mga pulis nga gipangtaktak na unta sa serbisyo, apan nakabalik na hinuon.

Duna say mga reklamante ug saksi nga wa na makatunga sa mga husay hinungdan nga na- dismiss ang kaso. Kana nangahitabo kaniadto. Kon nahitabo kini kaniadto, unsa na kaha karon?

Duna bitaw nangreklamo nga gibutangbutangan sila sa mga pulis, apan wa mopadayon kay nakahibawo sila sa mamahimong resulta busa di na lang sila maghago.

Gawas kon ang CHR ug Napolcom makapakita og maayong trabaho pinaagi sa paglansang ug pagsilot sa badlungong mga pulis, di sila makapaabot pa nga moreklamo ang publiko batok sa mga pulis nga hilig magbinuang.

Kay gani hangtod karon, daghan pa sa mga pulis nga nalambigit sa illegal drugs nga wa gihapon masiloti. Nagpabilin gihapon silang gawasnon.

Basta naa pa ang corruption, ang publiko pabiling magkurog sa kahadlok hinungdan nga magpabiling tak-om.