Katuohan dili
Sa atong kinab8uhi, hayan nga makasugat kitag mga butang ug mga sugilanon nga alang kanato katuohan o dili. Kadaghanan kanila mugna lang sa imahinasyon sa nagsugid o nagsulat.
Makalingaw. Makapahimuot. Sama sa mga anib sa sugilanon sa magasin nga Bisaya nga kanhi maoy akong basahon kaniadto sa didto pa ako sa Cabadiangan.
Usa na niini mao ang suglianon ni Esboy nga usa ka henyo. Matod pa sa tagsulat sa iyang pagtapos sa maong estorya, “The human mind is a wonderland of incredible things, little understood and largely unexplained.”
Usa sa mga asoy nga di katuohan mao ang pamahayag ni Presidente Rody Duterte nga ang pamilya ni kanhi diktador Ferdinand Marcos, nga giakusahan sa pagsurikbot sa mokabat sa $10 bilyunes, andam nga mouli ngadto sa kaban sa gobyerno sa kabahin sa maong kantidad.
Lakip na niini ang mga gold bullions aron makatabang sa mga galastohan sa gobyerno ug kaminosan ang budget deficit.
Apan kon mouli ang pamilyang Marcos sa bisan unsang kantidad kaniadto sa panudlanan sa kagamhanan, sama da nga niangkon sila nga ang maong katigayunan kinawat gikan sa kagamhanan.
Hangtod sa miaging tuig, ang Presidential Commission on Good Government (PCGG) nakabawi og mokabat sa P170 bilyunes nga ill-gotten wealth gikan sa mga Marcos ug sa ilang mga cronies. Nalakip kini sa mga
Swiss bank deposits, mga shares of stock ug real estate ug mga mahalong paintings ug alahas.
Si kanhi Presidente Corazon Aquino maoy nagmugna sa PCGG. Daghang mga kabtangan sa mga crony ni Marcos ang na- sequester.
Pero daghan kanila nagpabiling mga adunahan ug gani maoy nagkontrolar sa politika sa ilang mga dapit. Si House Speaker Pantaleon Alvarez namahayag nga mas maayo kon iuli sa pamilyang Marcos ang tanan nilang katigayunan ngadto sa gobyerno. Sa ako nang giingon sa unahan, kon ila kining buhaton, sama da nga giangkon sa mga Marcos nga ang tanan nilang katigayunan kinawat gikan sa gobyerno.
Ang iuli mao ang inuslan, mao ang kinawat. Kon moingon ang mga Marcos nga wa sila mangawat sa kaban sa kagamhanan, unsa may ilang iuli?
Alang kanako, kon mohatag man ang pamilyang Marcos sa tipik ug kabahin sa ilang katigayonan ngadto sa gobyerno, maayo tingali nga ingnon na lang nga kini ilang amot alang sa kalamboan sa atong nasud.