Bb. Cebu: labing daku nga bangga sa kaanyag
Ang labing daku ug tinamod nga bangga sa kaanyag.’ Kini ang pasiatab sa mga tigpasiugda sa labing unang Binibining Cebu. Tanang mga syudad ug lungsod sa lalawigan dunay kandidata.
Bale 55 silang tanan kay duha ang sa Cebu City alang sa North ug South. Pulos maanyag ug maayo motabi.
Dunay mga nakaapil nag dagkong bangga apil na ang didto sa Manila ug gawas sa nasud pero tungod kay giisip nga tupong sa mga dagkong bangga, wa magduhaduha pagapil ang mga dalaga ug wa usab did-i sa mga tigpasiugda.
Gipasiugdahan sa Bb. Sugbu Charity Foundation Inc., giabagan sa Sacred Heart School for Boys Batch 1985 Foundation Inc. ug gipaluyohan sa mga dagkong kompaniya ang Bb. Cebu.
Gidasig ang mga kandidata sa paggamit sa pinulongang Cebuano sa ilang pagpakighimamat sa mga tawo sa lainlaing kalihukan lakip na sa grand finals.
Sa Okt. 28 ang koronasyon adto sa Waterfront Cebu City Hotel & Casino pero magtigi pa kaupat ang mga kandidata sa Philippine Terno Competition sa Sept. 23 sa Cabicera de Argao, Swimsuit Gala Dinner sa Sept. 29 sa Grand Convention Center, Evening Gown Competition sa Okt. 4 sa SM Seaside City Cebu ug sa Pre-pageant Interview sa Okt. 25 sa Oakridge Pavilion.
Molingaw sa mga manan-aw sa koronasyon ang Hey Joe, Don Juan, Side A, Cebu Symphony Orchestra ug Richard Yap nga sakop sab sa SHSB Batch ‘85.
Si Edu ug Luis Manzano ug si Ms. Earth 2008 Karla Henry ang mga program hosts.
Karon pa lang seguradong daghan na ang nag-atang niini.
○○○
Tungod sa mga kakuli-an, wa ko makasaksi sa Mga Dula sa Pagtoo nga gipasundayag sa Il Signore Theatre Co. 2021 didto sa Marcelo Fernan Press Center niadtong Lunes.
Pero matud pa ni Mons. Ting Ancajas, duna pay umaabot nga mga higayon nga ipasundayag kini. Maayo untag makasaksi na gyud ko.
○○○
Zero kuno ang lovelife ni Daniel Matsunaga karon kay super busy siya. Gawas sa teleseryeng A Love To Last, duna siyag tulo ka umaabot nga pelikula: The Hunted, Meant to Beh ug Fallback.
Nibisita si Daniel sa Cebu di pa dugay isip celebrity guest sa pag-abli sa Stan’s Tinolahan & Grill sa may Jasmin St. duol sa Provincial Capitol.