Samtang buhi may paglaum

Dear Papa Joe,

Tawga ko sa ngalan nga Tony, 27 years old, usa ka driver sa tricycle sa Mandaue. Hangtod karon wala pa koy uyab sukad nagkabuwag mi sa akong childhood sweetheart. Tan-aw nako di nako kakaplag og ing ato niya nga klase nga babaye nga para nako naa niya tanan.

Nagkabuwag mi dihang ni graduate siya og college ug ako 1st year lang gihapon ug walay deriksyon ang kinabuhi. Wala na sad ko katiwas kay namatay na man akong mga ginikanan ug wala nay mogasto nako sa pag-eskwela mao nga nanrabaho ko isip construction worker. Wala man say modawat n ako sa taas taas nga position kay gawas nga wa ko kahuman og college, puno pa og mga tattoo akong lawas.

Puno ko sa pagmahay sa akong pagpasagad sa akong kinabuhi ug karon ga drive na lang ko og tricycle. Ambot moasenso pa kaha ko aning kahimtanga ug maminyo pa ba kaha ko? Palihug tambagi ko. TONY

Tony,

Bay, daghan nang tricycle drivers diha nga naay mga anak nga gipaeskwela. Meaning naminyo sila mao nga dako ka og purohan nga maminyo. Kana kon di sad ka mamili.

Sa pag-asenso? Lingin ang kalibutan. Napobre man gani na ang mga datu diha. So, dako ang chance nga madatu sad ang mga pobre. Depende na sa imong diskarte sa imong kinabuhi, kon di ka mawagtangan og paglaum. Moumento pa ang imong kinabuhi kay duna ka pay panahon kay bata pa ka. Ako ing ana nga edad, latagaw man gani pero nausab man lagi ko. Mao nga hangpa ang kanindot sa kinabuhi. Samtang buhi pa, may paglaum. PAPA JOE