Inter-commercial tournament sa Talisay City Mayor's Cup

Human sa hataas nga panahon, mobalik na ang Open inter-commercial basketball tournament sa dakbayan sa Talisay sa dihang sugdan na karong Dominggo ang 2017 Talisay City Mayor’s Cup diha sa Talisay City Sports Complex sa Barangay Poblacion, dakbayan sa Talisay.

Pito ka mga team ang kompirmadong mosalmot sa torneyo nga gibahin ngadto sa duha ka bracket.

Sa Bracket A mao ang San Remegio, Fighter Wine (Fifty) ug Christwil/EGS Asia samtang sa Bracket B maghugpong usab ang Emil’s Cup champion SG/ARQ, Aspa Scaffoldings, Kimlex ug Shereen.

Atol sa press conference kagahapon sa buhatan ni Mayor Eduardo Gullas, si Congressman Samsam Gullas mipadayag nga kining paghibalik sa commercial

tournament sa Talisay maoy usa sa iyang katuyoan nga hinayhinay nga mabanhaw ang commercial league sa Sugbo.

“Ang ato gud nga tumong ani nga makatabang ta sa atong mga players ba nga permi silang makaduwa. At least makakuwarta sab sila. Wa na man gud tay commercial league ron mao nga atong paninguhaon nga makabuhi nig balik,” matod ni Gullas.

Gipasabot ni Gullas nga sa sunod tuig posibling mahan-ay na kining tanan diin upat ka sunod sunod nga lega sa iyang distrito ang mapahigayon. “Gikan sa Emil’s Cup sa Minglanilla sa Agusto, mosunod dayon ta dinhi sa Talisay (Septiyembre), dayon sa Naga kay duna na silay Charter Cup, ug ikaupat sa Carcar sa November sa ilang fiesta,” dugang sa batan-ong kongresista sa 1st District sa Sugbo.

Hinuon ang mga duwa sa open commercial tournament sugdan pa sa Septiyembre 18 diin ang SG/ARQ makigsangka sa Aspa Scaffoldings. Gawas sa tropeyo, ang champion sa torneyo makadawat og P80,000 ug P50,000 usab ang maangkon sa runnerup. Makabulsa usab og tag P30,000 ug P20,000 ang third ug fourth placers. Subay niini, 14 ka mga teams nga gibahin ngadto sa upat ka grupo ang mosalmot sa Inter-barangay tournament sa juniors division samtang 12 usab ang magtigi sa seniors division nga gibahin usab sa tulo ka bracket. Sa juniors division, ang magtigi mao ang Tanke, Pooc 1, Maghaway, Poblacion, Pook 2, San Isidro, Dumlog, Lagtan, Mohon, Camp 4, Cansojong, Tabunok, Biasong ug Lawaan.

Ang mga misalmot sa seniors division mao ang Cansojong, Tabunok, Poblacion, Pooc 1, Biasong, Lagtang, Tanke, Maghaway, San Roque, Dumlog, Mohon ug Pooc 2.

Adunay usay volleyball tournament sa men’s ug women’s division nga sa gihapon apilan sa mga barangay sa maong dakbayan. / JBM