ROMEO VS. CASTRO
Panagtigi sa duha ka inilang pointguard sa Gilas Pilipinas maoy mahimong sentro sa atraksiyon karong gabii sa dihang suwayan sa TNT Ka Tropa ang pagpataas sa ilang signal sa nagpadayon nga PBA Governor’s Cup pinaagi sa pagpakigsakbang sa dili usab mayano-yanonga GlobalPort Batang Pier nga ipahigayon sa Ynares gym sa Antipolo, didto sa Kauohan.
Ang Ka Tropa nga lab-as pa sa ilang ikaupat nga kadaugan sa dihang ilang gipakgang ang tulo ka sunod sunod nga daog sa Blackwater niadtong Miyerkules, 117-96, sa makausa pa mosandig sa kahanas sa beteranong pointguard nga si Jayson Castro, ang beteranong pointguard sa Gilas Pilipinas, sa ilang pagpakigbatok sa GlobalPort (2-3) nga pangulohan na usab karon sa laing kilas ug lantip nga Gilas
pointguard ug Sugboanong si Terrence Romeo.
Di ikalalis nga ang duha maoy nahimo karong lig-ong puwersa sa Gilas sa backcourt
area ang nakapakita usab sa ilang saktong katakos sa niaging Asian Games bisan pa man og milandig sila sa ikapito nga posisyon.
Kon panaghugpong ug panagtambayayong ang ilang gimatuto sa Gilas, karong gabii ang palabwanay na usab sa ilang tagsatagsa ka kalidad ang ipakita.
Samtang ang Blackwater, human mabalda ang tulo ka way putol-putol nga kadaugan, mosuway usab pagpabarog og balik sa pagpataas sa ilang moral.
Ning higayona, mosulod sa korte ang Blackwater nga inilog batok sa wala pay daog nga Kia Picanto nga nangiwit sa
over-all standing nga 0-7 diin ilang gikauban ang laing wala say daog nga Alaska Aces (0-6).
Sa laing bahin, ang pagpakigni Chris Ellis sa
crowd-favorite Barangay Ginebra napupos na. Kini human nga ang Fil-Am
forward kagahapon gibaylo ngadto sa Blackwater bugti ni Art dela Cruz nga maoy nagputol sa lima ka tuig ubos sa Kings, ang team nga nakapahimo usab niyang usa sa pinaka popular nga sakop sa Ginebra.
Ang kalambuan nakompirmar sa Spin.ph gikan mismo sa tag-iya sa Blackwater nga si Dioceldo Sy. Gawas niini naapil usab sa binayloay mao sila si Dave Marcelo sa Ginebra ug Raymund Aguilar sa Blackwater. Si Sy ug ang SMC Sports Director ug Ginebra alternate governor Alfrancis Chua maoy mipatigayon sa binayloay niadtong Miyerkules ug wa kini nakitang problema hinungdan nga giaprobahan gilayon sa Commissioner’s Office. /