BAKA.
■ Mga Muslim miihaw sa usa ka baka gawas sa Alkhariah Mosque sa 950 South Road, Brgy. Basak, San Nicolas, dakbayan sa Sugbo kagahapon sa buntag. Nunot kini sa ilang kasaulogan sa Eid’L Adha.
Di mominos 80 ka mga bata nga tinun-an sa International Fraternity Association (IFA) ug ubang mga Muslim gikan gikan sa nagkadaiyang mga siyudad dinhi sa Sugbo ang nakadawat sa gipanghatag nga mga karneng baka nga giihaw kagahapon sa Danglag, Brgy. Polpogan, lungsod sa Consolacion agig pagsauolog sa Eid’l Al-adha.
Gitambungan sab kini sa siyam ka mga ustads diin lima niini Turkish ug upat ka mga Pilipino.
Ang maong kalihukan diin sila nag-ihaw og di mominos 25 ka mga baka dungan nga gihimo sa ubang mga dapit sa nasud.
Ang kalihukan pagahimuon sulod sa tulo ka adlaw sugod kagahapon.
Matod ni Ustads Mehmet Yalcin nga Tumong niini mao ang pagpadayag sa ilang relihiyon nga motabang sa mga tawo.
Ang pagpanghatag sa mga karneng baka gitawag og Qurbani Operation nga gipaluyuhan sa Singapore Qurban, IFA ug United Islamic Cultural Center of Philippines.
Base sa balaud sa tinuohang Islam, ang Qurban mao ang pulong nga gigamit sa pagsakripisyo og hayop atol sa Eid Al-Adha.
Matod ni Yalcim nga 24 ka mga baka ang ilang gi-ihaw sa Sugbo ug may laing 63 ka baka ilang giihaw sa Mindanao.