VENDORS MAKABALIK PAGTINDA
KON MGA RESIDENTE SA ERMITA NGA NANGREKLAMO MAKOMBINSER: IMOK
Bisan kon gipapahawa sa mga opisyal sa Barangay Ermit ang 30 ka fish vendors kilid sa Unit-I sa Carbon Market, apan aduna pay kahigayonan nga makabalik sa pagpaninda.
Si Kapitan Felicisimo “Imok” Rupinta nagkanayon nga gipapahawa niya ang maong mga vendors gumikan sa reklamo sa 64 ka mga residente sa sityo Katsilaan sa kabaho sa ilang lugar mugna sa mga basura gikan sa isda.
Ang mga hasang, himbis ug tinai sa isda gihulagway ni Rupinta nga gipasagdan ra sa mga vendor.
Mamauli kini nga nagbilin sa mga basura nga maoy hinungdan sa langsi nga baho mao nga gipetisyonan sa mga lumolupyo.
Matod pa ni Rupinta nga makabalik sila og tinda kon ilang makumbinser ang mga petitioner bugti sa ilang paglimpyo sa lugar sa di pa nila biyaan uban sa pagbanwas og detergent aron mawagtang ang baho.
“Niduol nako ilang opisyal, akong gi-advisan nga kon maglisod mog ila nila (petitioner), akoy tapok. Gamit mog microphone. Hangyoa ninyo og maayo. Anha kos tunga kon mosugot sila ubos sa pagpanglimpyo ninyo sa lugar okay ko,” pasabot ni Rupinta. Nisuway og balik ang mga
vendor tulo na kagabii ang nakalabay apan napakyas sanglit gibabagan sila sa mga barangay tanod.
HUNONGON
Sa pagkakaron nagpadayon pagkolekta sa barangay Ermita og P10 matag ambulant vendor sa Carbon market matag adlaw.
Ang City Treasurer’s Office nipadala og suwat sa barangay Ermita nga hunongon nila ang ilang pagkolekta sanglit nakalapas sila sa market code.
Apan gipadayag ni Rupinta nga base sa ilang barangay ordinance nga maoy nagmugna sa Economic Enterprise Department, gitugogan silang makakolekta og P10 sukad niadtong 2002 isip voluntary kun walay pugsanay. /