MAGTIAYON SA BADIAN GIPAMUSIL NAMATAY
Magtiayon nga gihulagway nga anti-drug crusaders gipusil patay sa duha ka mga tawo sa ilang balay niadtong Huwebes sa alas 7:25 sa gabii sa Brgy. Malabago, lungsod sa Badian.
Si Alane Sinugbohan, 54, ug ang iyang bana nga si Surlito, 53, dead-on-arrival sa Badian District Hospital tungod sa mga samad pinusilan sa kalawasan.
Si Sr.Insp. Bonifacio Pareja, hepe sa Badian Police Station nga nahinabi sa Superbalita Cebu, nagkanayon nga duha ka wa mailhing gunman nga nag- bonnet maoy namusil sa magtiayong biktima.
Ang anak sa magtiayon nga si Daisy maoy nipahibawo sa kapulisan.
Si Pareja niingon nga sa ilang pag-abot nila sa dapit, nakit an ang mga biktima sa gawas sa ilang balay nga nagbuy-od nga naglunang sa dugo.
Gidali sa pagdala sa tambalanan sa Badian pero DOA tungod sa mga samad pinusilan sa kalawasan gikan sa mga bala sa kalibre .45 nga pistola.
Si Pareja nagkanayon nga gisubay nilang motibo nga naalaang asset sa pulis ang mga biktima.
Sumala pa ni Sinugbohan nga sa milabay nga buwan, si Surlito nipahibalo sa Badian Police station nga dunay laing pamilya nga nasuko kanila sa pagduda nga silay nitug an sa kapulisan kabahin sa kalihukan sa illegal nga drugas.
Gipadayag niya nga ang magtiayong Sinugbohan aktibo kaayo ug kanunay nagabag sa kapulisan ingon man sa barangay batok sa illegal nga drugs.
“Among gitutukan nga nadudahan silang asset kay aktibo sila sa anti drug campaign unya daghan nadakpan sa maong dapit,” dugang ni Pareja.
Nagtuo siya nga taga Badian ra ang mga killer. /