Traffic enforcer naaktuhan nga nagsuyop og shabu atol sa ronda

Traffic enforcer nga sakop sa Minglanilla Traffic Commission (MITCOM) nasakpan sa akto nga nagsuyop og shabu uban sa lain pang unom ka mga tawo sa sunodsunod nga operation sa kapulisan sa lungsod sa Minglanilla.

Apil sa nasikop mao ang duha ka managsuon kansang mga ginikanan ug igsuon pulos na anaa sa bilanggoan tungod gihapon sa pagpamaligyag shabu.

Niadtong Huwebes pasado alas 9 sa gabii, ang kapulisan sa Minglanilla mihimog buy

bust operation sa Sitio Bayong Barangay Cadulawan sa usa ka Chris Anthony Bastida, alyas Anton, 20 ug iyang igsuon nga menor de –edad nga nagpangidaron pa og 16 anyos.

Ang maguwang niangkon nga mamaligyaay gayod silag shabu, apan wala moangkon ang duha nga ila ang shabu ang nasakmit.

Apan nasayran gikan ni PO2 Aldin Traya nga ang mga ginikanan niini pulos na anaa sa bilanggoan tungod sa pagpamaligyag shabu.

Unang nasikop ang ilang maguwang babaye.

Nakuha gikan sa posesyon sa managsuon ang mga pakite sa shabu nga ang tanan mokantidad og kapin sa P11,000.

Samtang pasado alas 11:00 sa gabii sa mao gihapon nga adlaw ang mga operatiba nilahos sa Sitio Kantibhang Lower Pakigne Minglanilla nga niresulta sa pagkasikop usab ni Giv Geonzon, alyas-Jeboy 29, taga sitio proper Brgy. Pakigne, ug Arnulfo Malazarte, 36.

Ilang nasakmit ang 25 ka paketeng shabu nga mokantidad og mga P15,000.

Paglabay sa pipila ka oras, ang kapulisan nakadawat og report labot sa giingong nagsuyop og shabu sa usa ka payag sa Poblacion Ward 3.

Didto ilang naabtan sa akto sila si Carlito Ebora 54, sakop sa Minglanilla Traffic Commission (MITCOM), Noel Espura, 42 ug Donald Perocho, 41.

Tulo ka pakiteng shabu ang nakuha gikan sa mga suspek.

Si Ebora niangkon nga nigamit siyag shabu apan kadto ra usab nga higayo.

Siya sakop kanhi sa task force nga tig- demolish sa ilegal nga mga stall, apan gibalhin sa Mitcom.