'Sakop' sa namatay nga nga pulis nasikop sa ronda

Nasikop ang suspetsadong drug pusher nga giingong adunay kalambigitan ni anhing PO3 Ryan Martus Quiamco atol sa ronda sa kapulisan sa Sitio Kamagayan, Barangay Minolos, Barili, Sugbo kagahapon sa alas 8 sa buntag.

Giila ni Superintendent Joie Yape Jr., ang hepe sa Provincial Intelligence Branch (PIB), ang suspek nga mao si Gerardo Caballes Basera, 40, usa ka albularyo.

Ang ig-agaw ni Basera nga si Junibert Caballes Zaldo nga unang gironda nakaeskapo kay nakamatikod sa kapulisan.

Ang nangasakmit nga mga pakete sa gidudahang shabu mokabat sobra sa P200,000.

Si Yape nagkanayon nga silang Basera ug Zaldo mga sakop ni anhing PO 3 Ryan Martus Quiamco nga napatay sa Provincial Intelligence Branch sa miaging buwan.

Lakip sa napatay ang iyang asawa nga si Rizalyn.

Silang Zaldo ug Basera naa sa high-value target list sa Cebu Provincial Police Office.

Ang operasyon batok sa mga suspek gipasikad sa duha ka search warrants nga gipagawas ni Danao City Regional Trial Court Branch 25 Judge Jerry Dicdican.

Ang mga operatiba unang nirumbo balay ni Zaldo, apan nakaipsot kay nakabantay sa pag-abot sa mga pulis nga nangronda.