NALATAYAN OG DUMPTRUCK, PATAY

Gideklarar nga dead-on-arrival (OA) sa tambalanan ang 65 anyos nga lalaki human malatayi sa gikabangga nga dumptruck sa UN Avenue, Barangay Alangalang, dakbayan sa Mandaue kagahapon sa buntag. Giila ang biktima nga si Nelson

Sotto, lumad sa Poblacion, dakbayan sa Danao.

Matod ni PO1 Jason Dapar sa Traffic Management Unit sa Mandaue City Police Office (MCPO) nga si Sotto paingon sa dakbayan sa Lapu-Lapu.

Nagmaneho sa iyang motor (3791 GK) si Sotto alas 10 sa buntag sa dihang nahug sa libaong ug natumba.

Sigun ni Dapar nga sa pagkahug sa libaong, natumba ang motor ni Sotto ug kini nalabay sa atubangan sa nagsunod nga dumptruck nga gimaneho ni Corsino Maroliña, 39, taga lungsod sa Liloan. Nalatayan si Sotto sa dumptruck.

Daling gidala sa Mandaue City Hospital si Sotto apan patay na pag-abot.

Si Maroliña gibalhug sa Police Station 1 ug pasakaan ug kasong reckless imprudence resulting to homicide.

Kini na ang ikaduhang higayon nga namatay ang usa ka motorista sa aksidente sa samang dapit sud lang sa tulo ka adlaw ning semanaha.

Miyerkules, usa ka motorista ang namatay human naigo sa natumba nga lamp post nga hinungdan sa natuwad nga trailer van sa dapit.

Nangayo og hustisya ang kabanay sa gidangatan ni Robert Borlasa sa lungod sa Liloan.

Huwebes, napasakaan na ang drayber sa truck nga si Joser Potayre ug kasong reckless impudence resulting to damage to property with homicide. /