Armas napalgan nga sakay sa bus

(Napatik sa Agusto 22, 2017)

Padayon pa nga gisubay sa kapulisan sa Bunawan Police Station sa Davao City Police Office (DCPO) kinsay tagiya sa bag nga dunay pito ka .45 nga pistola ug usa ka Uzi machine gun nga gisakay sa Bachelor Bus gikan Tagbilaran City nga naharang sa checkpoint sa Task Force Davao sa Barangay Licanan, Bunawan District, Davao City. Mokabat sa 27 ka mga pasahero sa bus kinsa temporaryong giimbitahan sa kapulisan alang sa ilang mga pangutana kinsay tag-iya sa bag. “We are presently investigating the bus conductor and the 27 passengers, we have also two additional persons of interest (POI) who triggered our Facial Recognition Device and now being interrogated by our intelligence team,” mensahe ni DCPO director Alexander Tagum. Pag-abot sa bus sa TFD checkpoint, mihunong kini aron inspeksyunon, dihang natingala ang konduktor nganong bug-at ang usa ka bag dihang iya kining gialsa aron ipadaplin gikan sa running-board container sa ilawom sa bus. Gilayon dayon niyang gipahibawo sa mga personahe sa TFD hinungdan nga nanawag dayon silang taga Explosive Ordnance Disposal (EOD) team sa Davao City Police Office (DCPO) ingon man ang K-9 unit ug nakurat sila dihang gilingkuran sa K-9 Dog nagpasabot nga dunay kadudahang butang. / Jeepy P. Compio