Lami apan ginadili

Naglaway ko nga nagtan-aw sa akong estudyante nga nagkaon og manggang hilaw nga gituslob sa ginarapong hipon sa may gate sa unibersidad diin ko part- time nga nagtudlo.

Naahat intawon og pangagda kay naikog sa maestra. Ka puniton sab unta ko apan akong huna-huna mi-ingon ayaw kay basig mosaka akong pressure sa dugo sa kaparat ini.

Kay nagpa-ibabaw man ang akong huna-huna kaysa buhat, akong gibalibaran ang makatintal nga tanyag.

Nakapangutana ko ngano kaha nga ang mga lamiang pagkaon ginadili man hinuon?

Tungod ini, na ingganyo ko pagbasa ug suwat mahitungod sa mga pagkaong lami apan ginadili kay makasakit.

Sayod kita nga lain-lain ang tinubdan sa sakit nga cancer. Dunay kaliwat, nakuha sa subrang pagpanabako ug inum, na igo sa impeksyon og nakuha gikan sa mga chemicals sa palibot ug sa gipangkaon.

Sa gihimong pagtuon sa World Cancer Research Fund, kumon sa 20% nga dunay sakit nga cancer ang ka tambok, ka kuwang sa ehersisyo ug paturagas nga pagkaon sa mga daang hinimo o mga de lata.

Kining mosunod ang mga pagkaong puro lami apan ginadili:

Processed food sama sa hotdog, bacon, ug mga de lata sama sa cornbeef ug luncheon meat. Kini makapatas sa risgo sa Pancreatic Cancer kay duna kini mga sagol nga chemicals ug preservatives apil nitrates (para mo palami) nga gitawag og carcinogens. Mas maayong preskong karne ang lutoon kaysa daang hinimo.

Sunod ang lamiang potato chips. Kining pinirito nga patatas dunay hydrogenated nga mantika nga taas og transfat nga daling makapasaka sa cholesterol unya daghan sab og asin (Sodium) maong parat nga makapasamot ug makapasaka sa pressure sa dugo.

Mga isda nga binuhi sa punong kay gipangdapatan kini og antiobiotics, pesticides ug mga carcinogenic chemicals para ang isda dili daling mataptan og sakit. Mas maayong preskong isda gikan sa dagat ang kan-on kay mas taas kini og Omega 3 para sa atong kasing-kasing.