Ang sunog sa Calamba
Sa usa lang ka pamilok daghang plano ug pangandoy ang napurnada. Ingon niini ang paghulagway sa usa ka biktima sa sunog nga akong na- interview samtang nanghakot siya sa iyang butang palayo sa dapit nga nasunogan.
Ang akong gipasabot mao ang alarma sa sunog sa Barangay Calamba sa dakbayan sa Sugbo niadtong Miyerkules Di lalim kay paglabay sa usa ka oras nga kumbati sa mga bombero niabot ug 206 ka balay ang naugdaw ug 17 ang nakan-an sa kayo.
Ang mga panimalay gipasilongan og 286 ka pamilya nga gilangkuban ug 1,158 ka individual. Ingon niana kadaghan sa atong mga kaigsoonan ang way mga panimalay nga kapuy-an. Kini nahimutang sa sitio Almacen ug sitio Alseca.
Niadtong tuig 2009 ang maong dapit gialarmahan sab ug sunog. Sa ato pa ka duha na sila mabiktima ug ka duha na sab mapurnada ang ilang pagpuyo.
Sa akong pagbalik pagka ugma Huwebes sa buntag nakita nako ang daghang mga bata sa dapit nga nasunugan. Wa sila mo-eskwela kay nahurot og kasunog ang mga gamit ug uniporme sa eskwelahan.
Si Joy Calderon tinun-an sa Grade 9 sa Don Carlos Gothong Memorial High School nakakabig sa akong pagtagad human nihisgut nga gusto niya nga i- post sa iyang facebook account ang tabang nga gusto niyang ipanawagan.
Mao nga nanuktuk mi og internetan ug didto naghangyo siya sa facebook og tabang aron nga makabalik na sila pag-eskwela. Nanghinaot ko nga ang mga friends ni Joy sa Facebook motabang pagpaambit sa iyang panawagan ngadto sa uban.
Sa mga gustong motabang mahimong moderetso sa Barangay Hall sa Calamba o ba kaha sa ilang eskwelahan.
Wa man guy apil ang mga tinun-an sa financial assistance nga itunol sa city hall ug barangay.
Hinuon si Edna Mañacap ang assisting principal sa Bliss Elementary School diin mag-eskwela ang ubang tinunan nitug-an nako nga nakasugod na sab sila pagtigom og tabang para nila.
Ang lain nga naka kabig sa akong pagtagad mao ang gihimo sa pamilyang Salve sa dalan A. Lopez. Ang magtiayong Richard Mauch ug Mayeth
Salve Mauch nangunay pagapud apud og bugas , sardinas ug noodles alang sa mga biktima. Ang pamilyang Salve sa sitio Almacen diay nagpuyo kaniadto. Pagkadalaygon sa ilang gibuhat. MAGMATNGON
Matod sa Bureau of Fire Protection lain nilang gipangandamam karon mao ang ilang gitawag nga kitchen fire. Tungod kay Ber months di ikalimod nga ang uban natong kaigsoonan maabtan og grasya gikan sa mga kapamilya nga tua sa gawas nanarbaho.
Ang uban gikan sa mga benepisyo nga makuha gikan sa mga kompaniya o opisina sa ato. Ilang napanlantawan nga mas modaghan ang magluto o mogamit sa kusina pag-andam sa pagkaon. Sa ingon niini nga sitwasyon bantayanan kaayo ang kusina.