Modelo sa kalooy
Tangkod nga usa ka tuig karong Septiyembre 4 nga gikonsegrahan nga Santa si Mother Teresa of Calcutta didto sa Vatican sa Roma ni Pope Francis.
Panaminan ang kasaysayan sa iyang kinabuhi nga gideklarar una nga Beata sa 2003 gumikan sa maayong buhat pagtabang sa mga kabos, nanginahanglan gumikan sa kalisod, milagro nga nakaayo sa mga masakiton ug modelo sa kalooy hinungdan nga gibayaw ngadto sa altar sa mga Santos sa Simbahang Katoliko.
Si Santa Teresa maoy ika10,003 nga balaan nagsunod ni San Pedro Calungsod nga gikonsegrahan sa Okt. 21, 2012 ug nila ni Pope John XXIII ug Pope John Paul II nga gikonsegrahan sa Abril 27, 2014.
Tinuod nga ngalan ni Mother Teresa mao si Agnese Gonxha Bojaxhiu sa Albanian nga ginikanan. Iyang gitukod ang Missionaries of Charity sa 1950 nga adunay 4,500 ka mga madre nga nangalagad sa tibuok kalibotan. Namatay sa Sept. 5, 1997 sa Kolkata, India.
Ika-10,005 nga gibayaw nga Santos ni Pope Francis sa Mayo 2017 kadtong duha ka mga bata nga gipakita sa Birhen sa Fatima sa Cova de Iria sa Fatima, Portugal.
Mosunod nga ibayaw unya nga Santos mao si Pope John Paul VI nga gideklarar nga Beato sa Okt. 19, 2015 sugo sa balaang hiyas, bayanihong mithi ug Diosnong mitna. Laing unom ka mga Pilipino nga umaabot nga Santos diin usa niini Sugbuanon nga si Mons. Teofilo Camomot nga taga Cogon, Carcar.
Gihulagway nga buhing santo sa pagkamatinabangon apan ideklarar pa nga Beato. Si Camomot natawo sa Marso 3, 1914. Naordinahan pagka-pari sa Dis. 15, 1940. Founder sa Daugthers of Saint Teresa sa 1959. Namatay sa Sept. 27, 1988 sa aksidente sa kadalanan sa Barrio Baho, San Fernando, Cebu nga anaa gipabarog ang iyang monumento.
Iyang lubnganan sa Dauthters of Saint Terese Mother House sa Valladolid, Carcar diin ang maong shrine usa na ka tourist attraction. Daghang mangadto ug gimilagrohan nga nangaayo sa ilang gihambin nga balatian.
Sa miaging tuig 2016 maoy pagtimaan sa tuig sa parokya isip Communion of Communities nga gisugdan sa unang Domingo sa Adbiyento, Nob. 26 pangandam alang sa dako nga kasaulogan sa ika-limang centennial sa pag-abot sa kristyanismo sa Pilipinas nga gibitbit ni Portuguese Navigator Ferdinand Magellan gikan sa Espanya sa 1521.
Gikatakda usab nga ugkaton ang habog nga estatuwa ni Lapu-lapu sa Luneta nga ibalhin sa Datu Mangal area, Punta Engaño, Lapu-lapu pangandam usab sa ika-500 ka tuig sa selebrasyon sa kagawasan.