Irving nanamilit sa Cavaliers, wa ni James

Human na- finalize ang iyang pagbalhin sa Boston Celtics, nangayo og pasalamat si Kyrie Irving sa mga fans sa Cleveland Cavaliers apan wala kini naghisgot kabahin kang four-time MVP LeBron James.

Si Irving, kinsa nakabaton og titulo sa National Basketball Association (NBA) niadtong 2016 ubos sa kampo sa Cavaliers diin kaabag niya si James, nag- post sa social media og pasalamat nga mga mensahe ug video.

Sa iyang mensahe, mihisgot og pipila ka mga rason si Irving kon nganong nakadesisyon sa iyang mobiya sa Cavaliers nga iyang natabangan nga makasulod sa finals sa miaging tulo ka sunodsunod nga seasons.

Nananghid si Irving sa mismong tag-iya sa team nga si Dan Gilbert kabahin sa iyang intensyon sa miaging buwan.

“You understand the magnitude of decisions that you make in your life can affect a lot of people all at once,” asoy ni Irving sa iyang video.

“And when you get to that point and you understand that the best intentions for you and ultimately to be in your truth, and find out what you really want to do in your life and how you want to accomplish it — that moment comes and you take full advantage of it. And there are no other ulterior reasons other than being happy.”

Ning maong pamahayag, masabot nga gusto ni Irving nga makabiya sa anino ni James, kinsa maoy gikonsiderar nga lider sa Cavaliers.

Isip baylo ni Irving, nakuha sa Cavaliers gikan sa Celtics sila si All-Star guard Isaiah Thomas, forward Jae Crowder, center Ante Zizic ug 2018 first-round pick nga nakuha sa Boston gikan sa Brooklyn.