2 patay sa managlahing aksidente sa dan

Duha ang patay sa managlahing aksidente sa kadalanan sa Sugbo.

Patay ang nagmaniho sa multicab human maigo ang motor ug nibangga sa nakaparada nga taxi daplin sa dalan sa eskina Cabangcalan, Barangay Talamban, dakbayan sa Sugbo, pasado ala una sa miaging kaadlawon.

Ang biktima mao si Almer Manlise, 34, taga lungsod sa Liloan ug maoy nagmaniho sa multicab.

Naangol si Raymundo Semblante, taga Talamban ug nagmaniho sa motorsiklo ug back-rider nga si Jerome Cadampog, 26, taga Canduman, dakbayan sa Mandaue.

Daling gidala sa tambalanan sila si Manlise, Semblante ug Cadampog, apan si Manlise nakabsan sa kinabuhi.

Samtang sa lungsod sa Moalboal, usa ka motorista ang patay human siya nibangga sa nagparada nga sakyanan sa national highway sa Barangay Poblacion East.

Ang biktima naila nga si Robert Fabellar, taga Brgy. Tuble, Moalboal.

Base sa pakisusi sa kapulisan, nasayran nga pasado alas 10:00 sa gabii niadtong Biyernes, nagbiyahe si Fabellar paingon sa Moalboal Proper ug dihang niuturn, nibangga kini sa nakaparadang sakyanan.

Ang biktima nakabsan sa kinabuhi sa Badian District Hospital tungod sa dakong samad sa ulo.