Palma mihagit sa KBP sa pagkabalaanon

Gihagit ni Arsobispo Jose Palma ang mga sakop sa media nga ang tibuok nga kamatuoran ang ipagawas sa ilang pagbalita o paghatag og kasayoran ngadto sa publiko.

“But sometimes we put a question mark, when we feel that not all the truth, sometimes just a piece of the truth or sometimes even the President would question some of the media when he would say that perhaps some half truths are being reported,” pahayag sa arsobispo nga maoy nisaulog sa misa sa pagbukas sa usa ka buwan nga kasaulogan sa Kapisanan ng mga Brodkaster ng Pilipinas (KBP) Cebu Chapter kagahapon.

Ang arsobispo nidasig usab sa mga magsisibya sa Sugbo nga sa matag komunikasyon ipakita ang balaanon nga mga pulong.

Sa iyang wali, si Palma niingon nga gawas sa madawat nga sweldo ug dungog nga maangkon sa mga magsisibya gumikan sa ilang trabaho, mabati usab nila ang tinuoray nga kalipay pinaagi sa pagbuhat og maayo.

Ang arsobispo nanghinaot nga pinaagi sa ministry nga gipili sa mga magsisibya, maghatag kini og inspirasyon, paglaom ug maggiya sa mga tawo, makapaamgo sa mga tawo sa kanindot sa kalibotan ug sa mga binuhat ug pagpakabana niini sa kalikopan.

Ang kalihokan gisugdan pinaagi sa parada nga nanukad sa Fuente Osmeña Rotunda paingon sa gym sa University of San Carlos (USC) main campus, siyudad sa Sugbo. Gatosan ka mga magsisibya ug empleyado sa lainlaing mga AM ug FM stations sa Sugbo ang nisalmot sa kalihokan.

Samtang, niawhag si Palma sa publiko nga mokooperar sa Presidente sa kampanya batok sa gidili nga druga sa nasod.

Ang arsobispo nipahinumdum sa mga opisyal sa barangay sa ilang responsibilidad nga maoy mandato nga gihatag kanila sa balaod sama sa pagtabang nga masumpo ang pagkatap sa gidili nga druga sa ilang lugar.

“Kon atong hunahunaon, we should cooperate all officers

labi na barangay officials, they have a mandate to serve the barangay,” dugang ni Palma. Gisulti kini sa arsobispo human sa sunodsunod nga pagkasikop sa mga opisyal sa kabarangayan sa lalawigan sa Sugbo nga giingong dunay kalambigitan sa gidili nga druga ug paghupot og mga armas nga way mga lisensiya.