Mobisita sa Sugbo ang Birhen sa Antipolo
Mobisita dinhi sa Sugbo sud sa duha ka adlaw karong sunod semana ang milagruso nga pilgrim image sa Our Lady of Peace and Good Voyage nga gikan sa Antipolo, Rizal.
Higayon kini sa mga magtutuong Katoliko ug Marian devotees nga makapaduol ug mangaliya sa Birhen sa Antipolo.
Ang imahen unang mobisita sa iyang bana si San Jose sa St. Joseph National Shrine sa dakbayan sa Mandaue sa Septiyembre 12 sakay sa convoy gikan sa Mactan Cebu International Airport.
Sugaton kini og misa sa alas 7:30 sa buntag. Pagka alas 9:30 sa buntag, dad-on ang imahen sa Cebu Metropolitan Cathedral diin dunay ihalad nga misa sa alas 11 sa buntag.
Pagka ala 1:00 sa hapon, adto na usab kini sa iyang anak, Señor Santo Niño, sa Basilica Minore del Santo Niño.
Sa alas 2:00 sa hapon sa samang adlaw, himuon ang misa sa Basilica.
Pagka alas 4 sa hapon, ang imahen dad-on sa Tabor Hills sa Barangay Talamban, siyudad sa Sugbo diin dunay welcome mass sa alas 6:00 sa gabii nga pangulohan ni Padre Crisologo Suan, OAD, prior provincial sa Order of Discalced Augustinians (OAD).
Alas 6:00 sa buntag sa Septiyembre 13, dunay misa ug isunod ang vigil ug veneration dayon rosaryo sa alas 4 sa hapon.
Pagka alas 5:00 sa hapon, himuon ang high mass uban ni Tandag Bishop Emeritus Arineo Amantillo ug dayon ang solemn procession sa alas 6:30 sa gabii paingon sa San Jose Road, Tigbao Road hangtod sa main highway sa Talamban dayon Kauswagan Road.
Pagka Septiyembre 14 sa gabii, dad-on og balik ang imahen sa Birhen sa Antipolo sa kaulohan.
Si PJ Ghunner Balasabas, assistant secretary sa Hermandad de la Correa y de Sta. Rita de Cascia, niingon ang pagbisita kay kabahin sa dako nga selebrasyon sa simbahan sa ika 91 nga anibersaryo sa canonical coronation sa Our Lady of Peace and Voyage sa Luneta Park niadtong 1926 atol sa International Eucharistic Congress.
Si Padre Randy Lozano, provincial secretary, OAD, namahayag nga sa panahon karon diin dunay kagubot sa Marawi City ug nangamatay sa mga operasyon batok sa gidili nga drugas, angayan nga mag-ampo ang mga tawo alang sa kalinaw pinaagi sa pangaliya sa Birheng Maria.
“This visit would remind us to cater our spiritual needs kay nakalimtan nato ang Ginuo sa atong kinabuhi,” pamulong niini sa pakighinabi sa mga tigbalita niadtong Sabado.
Gawas nga naghatag og inspirasyon sa mga tawo nga nangita og kalinaw, ang Birhen sa Antipolo mao usab ang patroness sa mga pilgrim, seafarers, ug biyahero.
Ang komunidad sa OAD sa Tabor Hills ang nag-unang host sa bisita sa Birhen tungod kay suod ang rector sa National Shrine sa Our Lady of Antipolo nga si Padre Renante Tolentino ug ang kaparian sa OAD.