Hangyo sa CocaCola sa Mandaue gipasalikway sa komitiba konseho

Girekomendar sa komitiba sa Appropriation, Budget and Finance sa konseho sa dakbayan sa Mandaue nga isalikway ang hangyo sa Coca- Cola Femsa Phils., Inc. nga di na sila pabayron sa penalty sa ilang buhis sa ikaduhang kwarter sa 2017 nga nadugay nila og bayad.

Kini maoy unod sa committee report no. 119-2017 ni Konsehal Nenita Ceniza-Layese, chairman sa komitiba.

Niadtong Mayo 11, nipadala og suwat-hangyo si Roy Hizon, senior executive sa Finance and Administration sa Coca-Cola Femsa Phils. Inc. nga di na sila pabayron sa P90,090.59 nga penalty sa pagkalangay nila og bayad sa business tax sa dakbayan.

Nipahamtang og penalty ang City Treasurer's Office human nibayad ang kompanya sa ilang buhis niadtong Mayo 5, duha ka semana nga late sa deadline nga Abril 20.

Ang suwat-hangyo gi-endorso sa Local Finance Committee (LFC) niadtong Mayo 18.

Atol sa deliberasyon sa LFC meeting niadtong Agosto 11, kini mipadayag nga ang pagkalangay sa ilang pagbayad resulta sa ilang pagpabaya.

Nasuta ning mantalaan nga gibahaan ang maong kompanya niadtong Abril 16 nga duol na sa deadline sa pagbayad sa buhis sa ikaduhang kwarter. Ug giingong 13 ka mga bloke ang naguba sa baha.