Bana naghikog, asawa sigeg FB

(Napatik sa Agusto 23, 2017)

Naghikot og pisi sa iyang liog ang usa ka bana nga napalgang wa nay kinabuhi sud sa ilang panimalay sa Ganghaan, lungsod sa Tagoloan, Misamis Oriental. Giila ang biktima nga mao si Johnny (bansagon gipugngan), 22, residente sa samang dapit.Ang igsoun sa biktima nga giilang si Jun nibutyag nga posibleng selos ang hinungdan sa paghikog sa biktima gumikan kay sa wala pa kini naghikog giingong nag-away kini sa iyang asawa. “Wala ko kabalo pero murag selos ang hinungdan,” matud ni Jun. Miabot kanila nga report nga gikasuko pag-ayo sa biktima nga daghang chikinini ang liog sa iyang asawa apan padayon pa kining gisuta kon tinoud labina gi-deny kini sa asawa. Gika-report sab nga gakaulitan sab sa biktima kay gasige atubang sa iyang cellphone iyang asawa ug magsige og Facebook. Dugang ni Jun nga namaligya og mais ang biktima agi og panginabuhian niini samtang ang asawa anaa lamang sa ilang panimalay. Mao na lamang nakita sa iyang asawa iyang bana nga nagbitay gamit ang pisi sud sa ilang panimalay. Ang patayng lawas anaa gidala sa Everlasting Funeral Homes kinsa gidala na sa puloy-anan sa uyoan niini sa Brgy. Casinglot alang sa iyang haya.