Ulitawo, 19, gipusil patay
(Napatik sa Agusto 23, 2017)
Gituohang kawatan sa area of responsibility (AOR) sa Talomo Police Station ang gipusil-patay didto sa Samantha Homes Subdivision, Barangay Matina Pangi, Talomo District, siyudad sa Davao. Ang biktima nailhang si Joel Miñoza Padernal, alyas Biboy, 19, ulitawo ug nagpuyo sa nasampit nga dapit. Sa inisyal nga imbestigasyon ni SPO1 Harold Delima sa homicide section sa Talomo PNP nga nagpalit lang og sigarilyo ang biktima dihang gipusil sa wa pa mailhing mamumuno. Dead on the spot ang biktima kinsa nakaangkon og samad pinusilan sa likod ug tangkugo samtang ang mamumuno daling misibat human sa hitabo. Miguwa sab sa imbestigasyon sa kapulisan nga suspek ang gipatay sa sunod-sunod nga kawat sa dapit. Ang kapulisan padayong naghimo og imbestigasyon sa krimen.