Espenido di madayon sa Iloilo City
Gikanselar ang pagdes ni Chief Inspector Jovie Espenido ngadto sa Iloilo City, sumala pa ni Police Regional Office 6 (PRO6) Director Cesar Binag niadtong Sabado sa usa ka press conference nga nakonpirmar sa pagkapatay sa giingong drug lord sa Western Visayas nga si Richard Prevendido, alias “Buang.”
Si PNP chief Director General Ronald “Bato” dela Rosa niingon nga si Espenido magpabilin isip hepe sa Ozamiz City police. Mas gilapabi niya nga magpabilin si Espenido didto aron makompleto ang paglimpyo sa maong syudad gikan sa krimen ug illegal nga drugas.
Duna pay tiwasunon. Kinahanglan pang kompletuhon. Sa ato pa di pa diay “mission accomplished” si Espenido didto sa Ozamiz City?
Si Presidente Rody Duterte mismo ang nianunsiyo sa pagdestino ni Espenido ngadto sa Iloilo City niadtong Agusto 28. Matod pa sa presidente, ang Iloilo mao ang labing "shabulized" nga lalawigan sa ansud.
Apan gisupak ang pagtudlo kang Espenido, usa ka Chief Inspector, nga hepe sa kapulisan sa Iloilo City kay di siya kwalipikado kay ang usaka highly-urbanized city sama sa Iloilo nagkinahanglan og labing menos usa ka Senior Superintendent.
Apan si Bato niingon nga gihimo nilang exemption si espeneido pinaagi sa pagtudlo niya nga usa lang ka officer-incharge sa Iloilo City police.
Daghan ang nag-atang kon unsay mahitabo kon nadayon pa si Espenido sa pagkahepe sa kapulisan sa Iloilo City.
Si Espenido mao ang hepe sa kapulisan sa Albuera, Leyte sa dihang napatay si Albuera mayor Rolando Espinosa Sr. sa usa ka ronda didto sa yang selda sa Baybay City subprovincial jail. Si Espenido sab ang hepe sa kapulisan sa Ozamiz City sa dihang napatay si Ozamiz City mayor Reynaldo Parojinog sa usa ka ronda.
Makaginhawag lawom niini si Iloilo City Mayor Jed Mabilog nga gihinganlan ni Presidente Duterte nga nahilambigit sa illegal nga drugas, akusasyon nga gihimakak ni Mabilog.