Customs bungkagon?

Mitumaw ang sugyot nga bungkagon ang Bureau of Customs (BOC) tungod sa dili na matulon nga halapad nga korapsiyon nga naghimo apiki sa nasod, imbes gisangonan nga mokolekta og insaktong buhis.

Apan subo nga pamalandungon nga sukad niadto pa, ang BOC giila nga usa sa labing kurakot nga ahensiya sa kagamhanan ug pipila lang sa mga dagkong pagpalusot ang nabutyag sa publiko sa sama sa kapin sa P6 bilyones nga shabu gikan sa China niadtong Mayo ning tuiga. Niagi pa sa 'fast lane' sa BOC?

Sama sa dili na matulon ang pagkakurakot sa mga kawani sa BOC (pwera lang sa pipila) nga maklaro bisan sa yano nga tawo nga mamati ug nagtan-aw sa hearing sa Senado bahin sa pagpayuhot sa dakong kantidad sa drugas.

Walay konsensiya ang taga BOC nga nakigkunsabo sa mga negosyante sa ilegal nga druga. Pila kaha ang wa masakpi ug nakalusot. Gawas nga nahikawan na og buhis ang nasod, nagpasulod pa kini sa butang nga makadaut sa pangutok sa katawhan ug hinungdan sa mga mangilngig nga krimen.

Mao kini hinungdan nga si House Committee on Dangerous Drugs chair ug Surigao del Norte Rep. Robert Ace Barbers ningsugyot og balaudnon sa pagbungkag na sa BOC. Napuno na siya ug nawad-ang pagsalig sa ahensiya.

Dunay mga nindot nga punto nga gipasupot si Barbers ug solusyon sa pagporma og laing ahensiya nga mokolekta sa buluhisan sa aduwana. Apan gisupak kini sa usa ka party-list nga magbabalaud niadtong Biyernes ug nidason nga ang pagmugna og mas hugot nga polisiya maoy epektibong solusyon sa pagpuhag sa kurakot nga sistema.

"What we need is an effective way to weed out the bad and solve other related problems along the way. No country can exist without a Customs bureau," Aangat Tayo party-list Rep. Neil Abayon.

Ikaw, unsay imong panahom sa problema? Pagpakabana alang sa kaayohan sa tanan ug nasod.