Everytime you go
Nagtaligsik niadtong tungora. Misunod ko kang Eldo pagbiya sa among nahimutangan. Misakay siyag taksi. Nagpasinguwan ko. Gusto kong mabasa ang akong lawas kay basig mokunhod ang kainit sa gibati kong kaguol. Magpahilayo na sab si Eldo nako. Moadto siya sa Ormoc, sa iyang iyaan nga naminyo og taga didto.
Kapila na ba magpahilayo si Eldo nako? Ah kadaghan na. Kadaghan ko na sab siya sabta.apan nahimo siyang selfish kay wa siya maghunahuna sa bation kong kaguol ug frustration sa matag higayon nga iya kong biyaan aron pag-adto sa layo, nga kunohay matod pa niya, aron sa paghikalimot sa iyang pagka miserable nga pagka tawo. Giisip niyang miserable ang iyang pagka tawo tungod kay ang iyang mga ginikanan nagkabuwag ug wa na magtagad kaniya. Mao na lay gihatagan niini og panahon ang tagsa-tagsa nila ka pamilya.
Sakit gyud tuod, kon biktima ta sa broken home, labi nakon ang Mama ug Papa naminyo og lain unya duna nay tagsa-tagsa ka pamilya. Apan hangtod kanus-a nga ingon ani si Eldo? Hangtod kanus-a nga magpabilanggo siya sa kagahapon?
Hangtod kanus-a nga mahimo siyang selfish?
Misakay sab kog taksi. Pagabot ko sa among balay sa Mango Avenue. Nakaurong ko pagsulod ko na sa sala, seryusong nagtan-aw si Ronnie nako samtang naglingkod siya sa sopa. Unya mitindog siya.
“Gihuwat tika, Jessica. Giingnan ko sa imong Mama ug Papa nga nagkuyog mo si Eldo.”
Nanghupaw ko. Nganong di man si Ronnie ang gipitik sa akong kasingkasing? Kon siya pa lang unta, malipayon unta ko ron sa akong lovelife. Sa kadugay nang panahon sa pagpangulitawo ni Ronnie nako, nasuta ko na nga true love ang iyang gibati nako. Karibal sila si Eldo. Hapit sila magkadungan sa pagpangulitawo nako. Sa eskuwelahan mi nagkaila si Ronnie. Parehas ming third year college. Nuon, lain-lain ang kurso nga among gikuha.
Bisan nakahibawo si Ronnie nga boyfriend ko na si Eldo, nagpadayon gihapon siya sa pagpangulitawo nako. Gusto gyud niyang ipakita nako nga usa ka matinud-anon nga gugma ang iyang gibati nako. Naluoy ko kang Ronnie, apan mas labaw kong naluoy kang Eldo.
“Mag-ilis sa ko, Ron.”
Luya kong misulod sa akong kuwarto nga diha ra sab duol sa sala.