Ayaw baliki

Dear Papa Joe,

Tagoa lang ko sa ngalan nga Jocel, 34 years old. Taga Europe na ko ron pero naa lang sa Pilpinas for a couple of months kay naa koy giasekaso nga kabtangan sa akong ginikanan, Taud taud nako naminyo ug naa na ganiy dalaga nga anak. Sa wala pa ko mobiya sa Pilipinas, naa koy uyab nga akong gibilin o matawag gyud siya og ex kay gabuwag mi sa wa pa ko makalarga kay siguro, mga bata pa mi ato ug immature pa siguro.

Siya ang akong first love hangtod na gipetionan ko sa akong parents ug didto nahimamat nako akong bana ug malipayon baya mi ug napapas gyud to akong ex. Karon nga nauli ko, wa damha nga nagkakia mi ug wa damha nibalik ag akong pagbati niya ug siya daw pud. Hinuon sa pagkakaron wala pa gyuy nahitabo namo pero gasige nami og lakaw nga kami ra nga wala gyuy nasayod, labi na akong bana sa akong kalaki. Mao ni akong suliran. Sakto kaha ni ang akong gibuhat? Palihug tambagi ko.

JOCEL

Jocel,

Di na na nimo angay ipangutana nga sakto ba ang imong gibuhat kay ikaw mismo nasayud ka nga sayop ang imong gibuhat. Bisan wala pay nahitabo ninyo, pagluib lang gihapon na.

Siguro naay gitawag nga unfinished business but naa na ka sa laing ang ang sa kinabuhi ug bisan gusto pa nimo, babagan gyud na nimo kay madaot lang ka. Sama sa sakit, kon diabetic ka, di na gyud ka mokaon og grabe ka tam-is bisan naanad naka ani kay kon di, madaot ka. Ana lang ka simple ang life, Day. Don’t make it complicated. Remember nga what goes around, comes around.

PAPA JOE