LANCERS MIBAWOS

Gibawsan sa defending champion University of the Visayas (UV) Green Lancers ang University of San Carlos (USC) Warriors pinaagi sa makutas nga kadaugan, 70-69, kagahapon sa CESAFI basketball college division sa Cebu Coliseum.

Sa kadaugan, naangkon sa Green Lancers ni coach Gary Cortes ang solong liderato dala ang 6-1 nga baraha samtang ningdakin-as ang Warriors sa 5-2 nga rekord.

Ang duha ka mga kampo nagpulipuli pagmugna og taas nga pagsutoy sa ilang opensa gikan sa sayong bahin apan nagtagbo lang gihapon sila sa krusyal nga bahin nga grabe ka sikit ang kombati.

Gikan sa 15-19 nga biya, ang Green Lancers ningmugna og 12-0 nga rally aron iposte ang 27-19 nga labaw sa pagpangulo ni MVP Rey Suerte.

Human niini, ang Warriors ni coach Bong Abad ningbawos og makabungog nga 17-1 run alang sa 36-28 nga bintaha sa halftime.

Ang Green Lancers, nga gipukan sa Warriors, 73-78, sa premiro nilang sangka niadtong Agusto 6, ning-rally na sab aron pahakan ang labaw sa Warriors, 40-43, sa nahabiling 4:12 minutos sa 3rd quarter.

Ning mga gutloa, mi-graduate ang usa sa mga sinaligan sa Green Lancers nga si Jerome Napao gumikan sa lima ka fouls.

Hinuon nagpadayon sa pagkamang ang Green Lancers hangtod natabla nila ang duwa, 52-52, human sa 3rd quarter.

Nakamugna og 66-59 nga labaw ang Green Lancers sa nahabiling 4:36 minutos apan sa hinayhinay, nakasikit pagbalik ang Warriors, 69-70, sa nahabiling 7.9 segundos.

Sa return play, gi- foul sa Warriors ang sentro sa Green Lancers nga si Monique Soliva nga maoy naghatod niini sa freethrow line sa nahabiling 5.3 segundos.

Nabuhian og paglaom ang Warriors human nasipyat ni Soliva ang iyang duha ka freethrows apan ang ilang sentro nga si Julius Cadavis maoy naka-out sa bola atol sa inilugay sa rebound.

Gikan sa inbound play, nailog sa Warriors ang posisyon sa bola apan naunhan sila pagtingog sa final buzzer una nakaitsa sa bola.

Gipangulohan ni Suerte ang kadaugan pinaagi sa iyang 26 puntos samtang nihatag og 11 puntos si Josue Segumpan.

Ang Warriors gipangulohan ni Bryan Saycon pinaagi sa iyang 18 puntos samtang nihatag og 13 puntos si Arg Araw-araw.

Sa high school division, gipangmakmak sa defending champion Sacred Heart School-Ateneo de Cebu (SHSAdC) Magis Eagles ang SWU Baby Cobras, 84-62.

Sa laing duwa, gipangpukan sa University of Southern Philippines Foundation (USPF) Baby Panthers ang Cebu Institute of Technology University (CITU) Wildkittens, 66-63.