Four-peat target sa Casili sa Mayor Alegado Cup '17

Nagtinguha ang Casili nga makaposte og rekord nga ‘four-peat’ sa ilang kampanya sa SK Category A sa 7th Mayor Teresa “Nene” P. Alegado Consolacion Fiesta Basketball Cup nga mosikad na karong Septiyembre 9 diha sa Consolacion Sports Complex.

Samtang ang Tilhaong, Lamac ug Garing mosuway pagdepensa sa ilang korona sa tagsatagsa nila ka mga kategoriya.

Ang Tilahong mamasin nga makabira og back-to-back titles sa SK Category B ug mao sab kini ang tuyo ug tumong sa Lamac sa Inter-Barangay Seniors Category A ug Garing sa Inter-Barangay Seniors Category B.

Ang SK division alang sa mga nag-edad og 18 hangtud sa 21 anyos samtang ang inter-barangay seniors alang sa mga nag-edad og 22 anyos pataas.

Ning tuiga, gidugang sa mga nag-oprganisa ang midget division o 17-under age group alang sa torneyo nga tipik sa kasaulogan sa tinuig nga pista sa Consolacion agig pagyukbo sa minahal niining patron San Narciso karong Oktubre 29.

Nagtuo si league commissioner Paul Alelu Flores, kanhi FEU Tamaraw sa UAAP, nga mas kulbahinam ang panagsangka sa torneyo gumikan sa pagkahimong kampiyon sa Consolacion Sarok Weavers sa North Division sa 1st Governor’s Cup Under-21.