BUDLER MOABOT SA MIYERKULES
Moabot na karong Miyerkules dinhi sa Sugbo si Hekkie “The Hexecutioner” Budler, ang challenger ni International Boxing Federation (IBF) world light flyweight champion Milan Melindo sa Pinoy Pride 42:Clash for Glory karong Septiyembre 16 sa Waterfront Hotel and Casino sa Lahug, dakbayan sa Sugbo.
Kuyog ni Budler ang iyang trainer nga si Grant Nathan nga sakay sa Emirates Airlined flight EK 338 nga moabot sa Pilipinas sa alas 4:20 sa hapon.
Si Budler, nahimong two-division world champion human niya mahupti ang IBO light flyweight title gikan niadtong Pebrero 2010 ngadto sa Enero 2011 sa wala pa knin mopaus-os sa iyang timbang ngadto sa 105-lb.
Iyang usab nga nalangkat ang nabakanting IBO world minimumweight title pinaagi sa pagpukan ni Pinoy fighter Michael Landero sa mao gihapong tuig.
Katulo ka higayon iya kining nadepensaan sa wala pa kini niya ibakante aron paglabni sa lain na usab mga WBA minimumweight sa usa ka unification match batok ni Karluis Diaz sa tuig 2014.
Nagpabilin niyang ang maong mga titulo hangtod nga sa Marso sa niaging tuig iya kining nabuhian sa dihang napildi siya ni Byron Rojas.
Si Budler sa kasamtangan mao ang IBO World light flyweight champion human niya mapukan ang Pinoy fighter nga si Joey Canoy pinaagi sa eight round technical knockout nga decision.
Sa Huwebes makig-atubang si Budler sa mga local media sa Radisson Blu Cebu sa usa ka press conference.
Mobisita usab siya sa mga radio stations, Television sa sunod nga mga adlaw alang sa promotion sa ilang away.
Sa Sabado, ipahigayon ang iyang pakighimamat sa iyang mga fams human sa Public Workout session sa Ayala Center sa alas 5 pm.
Mobisita usab siya sa mga newspaper outlet ug usa ka semana sa dili pa ang away makigkauban kaniya ang laing mga protagonista sa maong promotion sama kanila ni Richmond Djarbeng sa Ghana alang two-division world champion John Riel Casimero alang sa kalihukan sa tibuok semana.