PAKAUWAW SA MGA DURUGISTA
GILUSAD NI PAJO BRGY. CAPTAIN CHAN; LAPU-LAPU POLICE MIABAG
“Identified drug den area” maoy gimarka sa upat ka mga balay sa Sityo Kamanggahan, Barangay Pajo, LapuLapu City maoy gisampolan ni Barangay Kapitan Junard ‘Ahong’ Chan niadtong nagmagahi sa paghunong og gamit sa illegal drugs.
Kagahapon, uban sa kapulisan sa dakbayan sa LapuLapu, girumbo ni Chan ang upat ka mga balay.
Sa miaging semana pa nipahibawo si Chan sa iyang pagabuhaton.
Ni- supervise ang hepe sa Lapu-Lapu City Police Office, PSSupt. Romel Cabagnot sa maong kampanya nga nakaog siyam ka drug users sa dapit nga mosurender.
Gamit ang spray paint ug hulmaan sa letra ang gipintal sa matag atubangang pultahan sa maong mga balay nga paabangan nga gipanag-iya ni Rudy Lareno, 70.
“Kini among gihimo one way ni nga basin mahadlok sila o mauwaw sila sa among gitatak sa ilang area,” matod ni Chan nga giubanan sa unipormadong mga barangay tanod.
Taliwala sa hangyo ug mga pabor nga gitunol sa barangay sa katuyoan nga moundang ang maong binuhatan ug mausab ang ilang kinabuhi sa mga misurender, nahulog kini nga way bili tungod kay adunay pipila ang ningbalik sa ilang naandang bisyo.
Sumala pa sa kapitan nga midangop sa barangay si Lareno nga nagpahibawo nga ang mga kuwarto ug balay nga iyang gipaabangan gihimong suyopan sa mga nangabang niini.
Magsulod-gawas ang wa mailhing mga tawo sa maong compound ilabi na panahon sa kagabhion hinungdan nga nabalaka si Lareno ug posible nga madudahan nga iya lang gi-tolerate ang maong binuhatan.
Nagkanayon si Chan nga di mabasol ang barangay sa ‘shame campaign’ sanglit wa magkuwang ang barangay sa pagpahimangno ug hangyo nga mobiya na sa illegal drugs. “Dili ta mohunong ( shame
campaign), naa pay ubang area nga na-identify. We’re sending a message ngadto sa nagpasuyop nga undang na mo,” dugang pa sa opisyal.
Samtang si Cabagnot nga nikuyog sa kampaniya nakigpulong niadtong mga residente sa dapit.
Nagpangutana siya kabahin sa ilang katuyoan ug wa ma-zero ang opisyal sa dihang siyam sa iyang gikahinabi nitug-an nga tiggamitan og illegal drugs.
Giawhag sa hepe sa kapulisan ang maong mga drug user nga mosurender atol sa ilusad nga ‘One Time, Big Time’ anti-illegal drug campaign sa barangay Pajo sud ning semanaha. /