HADLOK SA PAKAUWAW

98 KA MGA DURUGISTA SA BRGY. PAJO, LAPU-LAPU MITAHAN

Dul-an sa 100 ka mga drug personality sa Barangay Pajo, Lapu-Lapu City ang nitahan kagahapon human sa gipahigayon nga ‘shame campaign’ niadtong Lunes.

Samtang andam moatubang si Pajo barangay kapitan Junard Chan sa Commission on Human Rights ( CHR) nga gikatahong mikuwestiyon sa gihimong pagpakauwaw sa gituohang mga durugista, kansang balay gipangmarkahan.

Gitug-an ni Chan nga dako og impact ang iyang gihimong pag-marka niadtong upat ka mga balay nga paabangan nga gipintalan og “identified drug den area” sa Sityo Kamanggahan, Pajo.

Moabot sa 98 ka mga drug surrenderer ang ningtunga sa ‘One Time, Big Time’ anti-illegal drug campaign.

Ningtunga ang hepe sa Police Station 3, Inspector Felix Cleopas, nga maoy nihatag og pagpasabot sa mga nisurender.

“Isip amahan (sa barangay), di ko gusto nga mapriso, mabuang ug mapatay ang akong anak (konstituente),” matod ni Chan ngadto sa mga drug surrenderer.

Nisaad si Chan nga mohatag og livelihood projects base sa skills sa mga surrenderer, ilabi na ang usa ka mall sa Mandaue City mo- order og Christmas lanterns ug decors.

Sa susamang kalambuan, andam siya nga moatubang ug manubag sa CHR nga gikatahong mikuwestiyon sa iyang gihimong ‘shame campaign niadtong miaging adlaw.

Buot sab niyang masayran og diin siya nasayop o nakahimo og kalapasan human nga ang landlord sa mga paabangan nga si Rudy Lareno, 70, nidangop sa barangay tungod sa di makontrolar nga gipanghimo sa mga nag-abang sa dihang hugpaan na sa mga manuyopay ang iyang dapit.

Dugang pa sa kapitan nga base sa ilang monitoring, pipila sa mga nailhang drug den sa laing sityo nangundang sa kabalaka nga maoy isunod og marka ang ilang pinuy-anan.

Samtang way pagsupak ang hepe sa Police Regional Office 7 sa shame campaign ni Chan.

Matod ni PRO 7 Regional Director Chief Supt. Jose Mario Espino nga si Chan nasayod na sa iyang gihimo sanglit chairman kini sa Barangay Anti Drug Abuse Council (BADAC) sa ilang lugar.

Nakita ni Espino nga epektibo ang maong lakang sanglit aduna dayoy drug users ang mitahan aron mosaad nga moundang na sa pagamit niini.