PULIS HIMUONG TRAFFIC AIDE

Mga pulis nga nag-atubang og kasong administratiba nga pending pa nga gidestino sa Personnel Holding and Accounting Unit sa Police Regional Office 7 patabangon pagsulbad sa kahuot sa dagan sa trapiko sa syudad sa Sugbo.

Matod ni Chief Supt. Jose Mario Espino nga kasagaran sa mga pulis nga naa sa RPHAU-7 way gihimong trabaho ug naa lang sa ilang buhatan nagpaabot kon kanus-a ang hearing sa ilang mga kaso. Bisan kon dunay mga pending nga kaso ang maong mga pulis, padayon kini nga nagdawatan og sweldo sa gobiyerno busa angay lang nga sila makita nga nagtrabaho.

Tungod niini, makatabang na unya sila sa pagsulbad sa kahuot sa dagan sa trapiko sa mga oras nga daghan ang mga sakyanan sa kadalanan. Ipakatap sila panahon sa

rush hour sa buntag ug mobalik sa hapon nga masinati na usab ang kahuot sa dagan sa mga sakyanan sa mga nag unang kadalanan sa syudad.

“Mostly those who are in holding center are just waiting and appearing on the hearing of their administrative cases. So sayang, sumusweldo sila doing nothing and ang thrust ko nga ay police visibility. So, this is one way of putting policemen on the street,” matod ni Espino.

Apan iyang gipaklaro nga ang trabaho sa maong mga pulis pagdumala sa dagan sa trapiko ug way labot sa ilang trabaho ang pagpanakop sa mga sakyanan.

Masaligon siya nga matunhay ra ang dagan sa trapiko sa Metro Cebu sanglit ang mga pulis napaubos sa training sa traffic direction and control.

Dunay dul-an sa 50 ka mga PNP personnel nga naa sa RPHAU-7 nga gitinguhang ipagawas sa kadalanan.

Moabag sila sa mga sakop sa City Traffic Operations Management (Citom) sa paggiya sa mga sakyanan nga di makahatag og kahuot sa dagan sa trapiko.

Ang hepe sa RPHAU-7, Sr. Inspector Andres Alpas, niangkon nga iya nang nadawat ang memorandum gikan sa Regional Operations and Plans Division pag- assign sa mga pulis sa Station 2 sa CCPO.

Matod ni Alpas nga mopadala siya og mga ngalan sa mga pulis ug ang hepe na sa Fuente police station ang magbuot kon asa sila ipangdestino nga karsada nga dunay problema sa traffic.

Gipasabot hinuon ni Alpas nga kasagaran sa mga pulis nga nadestino sa iyang buhatan mo report lang alang sa pagpa- check sa attendance ug magpaabot kon dunay mga kalihukan sa kampo sanglit sila ang gamiton niini. /