66-anyos naaktuhang 'mi-rape' sa 16 anyos

Naaktuhan sa usa ka amahan nga gilugos ang iyang 16 anyos nga anak sa iyang 66 anyos nga lalakeng kabanay niadtong Lunes sa buntag sa lungsod sa Brgy. Maharuhay, Medellin, amihanang Sugbo.

Mga ngan sa suspek, reklamante ug biktima gipugngan ning mantalaan.

Si Kael, minyo, mag-uuma, gisikop sa kapulisan human isumbong ni Pilo.

Si Sr. Inspector Maria Teresa Gutierrez,hepe sa Medellin Police Station nga nahinabi sa Superbalita Cebu, nagkanayon nga si Sarah nananghid kang Pilo nga maligo sa atabay sayo sa buntag.

Apan nahibulong si Pilo nga dugay nahibalik ang iyang anak hinungdan nga iyang giapas sa tabay.

Sa iyang pagsusi sa maong dapit, iyang nakit-an si Kael nga hubo ang lawas samtang nakighilawas sa iyang anak.

Gumikan sa hitabo, si Pilo dali nga nangayog abag sa kapulisan ug nasikop si Kael nianang Lunes sa hapon.

Matod pa ni Gutierrez, si Kael nangangkon nga sinabutan nila ni Sarah ang ilang gibuhat.

“Mao na iyang depensa nga sinabutan daw nila sa bata, “dugang Gutierrez.

Gipasabot niya nga bisan kon gipagawas ni Kael nga duna silay relasyon ni Sarah, makasuhan gihapon siyag rape sanglit kini menor de edad.

Nahibaw-an sa Womens and Children Protections Desk (WCPD) nga managparyente sila si Kael ug Sarah ug mahug nga apo na niya kini.