OPLAN PAKIGSANDUROT BANHAWONSASYUDAD

Banhawon sa Cebu City Government ang Oplan Pakigsandurot (OP) nga unang gilusad sa dakbayan sa Sugbo niadtong 2001.

Ang OP mao ang programa kaniadto ni Mayor Tomas Osmeña nga mosandig sa mga pulis nga nagpuyo sa barangay kinsa maoy maniid sa mga badlungon kaabag ang mga barangay opisyal ug tanod aron masumpo ang ilang dautang binuhatan.

Si Garry Lao, pangulo sa City Office for Substance Abuse Prevention (Cosap), nakig-alayon na ngadto kang PSSupt. Joel Doria, director sa Cebu City Police Office (CCPO), aron sa pormal nga koordinasyon tali may labot sa maong programa nga niani og maayong imahe sa publiko.

“We are reviving a program I first thought of in 2001, where policemen who live in the community are active, regardless of whether they are assigned there or not,” tipik sa pamahayag ni Osmeña nga gi- post sa iyang Facebook page.

Si Lao maoy gitahasan ni Osmeña sa pagpakigtambayayong ngadto sa mga barangay tanod aron usab hingusgan nila ang ilang kampanya batok sa kriminalidad ug ginadiling drugas.

Ang mayor nagkanayon nga epektibo ang maong programa sanglit ang mga pulis nga nagpuyo sa maong lugar suhito sa panghitabo sa iyang palibot ug dali ang pagsulbad o pagpugong sa krimen aron dili mahitabo gumikan sa ilang partisipasyon.

P2.9 MILYON NGA SHABU

Samtang dul-an sa P3 milyones nga balor sa shabu ang nasakmit sa kapulisan sa CCPO sulod sa usa ka semana nga operasyon gikan niadtong Agusto 28 hangtod Septiyembre 3.

Si Osmeña mi- post sa iyang Facebook page sa kalampusan sa matag estasyon sa kapulisan ilawom sa Cebu City Police Office (CPPO) ug sa special unit.

Labing dako nga nasakmit mao ang 107.48 grams sa Cebu Intelligence Branch sa tibuok siyudad nga gisundan kini sa station 4 diin ilang nasakmit ang 50.18 grams didto sa barangay Lahug ug Busay.

Sa kinatibuk-an ang CCPO nakasakmit og 250.66 gramos sulod sa usa ka semana nga mobalor og P2.96 milyones.

Ang mayor nidasig sa katawhan sa pagtext sa iyang numero 0917-329-9999 kon adunay mga kalihukan sa ginadiling drugas sa ilang barangay ug siya na mismo ang mohimo og aksyon.