Walay oil spill sa San Fernando: Naga Coast Guard

Giklaro karon sa Phil. Coastguard–Naga Substation nga dili oil spill ang nakit-an sa kadagatan sa barangay Panadtaran, lungsod sa San Fernando kon dili usa lang ka coal ash.

Samtang wala usay nakitang kalapasan nga nahimo ang barge nga nakaingon sa pagkatag sa coal ash diha sa kadagatan. Kini maoy gibutyag ni Chief Petty Officer Marcelo Panaginip, kinsa maoy sub-station commander sa Coast Guard sa City of Naga.

Hinuon ilang gipahimangnoan nga management sa barge nga dili na kini nila buhaton pag-usab.

Matud pa niya, nga sa ilang pakisusi ilang nasuta nga coal ash ang gidala sa mga barge padung ngadto sa Taiheiyo.

Samtang wala matilok sa paghakot ang coal ngadto sa Taiheiyo ug aduna pay daghang nahabilin sa barge ila na kining gilimpyohan ug gibanwasan sa tubig hinungdan nga ang coal ash didto mipaingon sa kadagatan.

Gani mismo ang ilang Marine Environment Protection Unit wala usay nakita nga angayang ika-alarma.

Kini tungod kay bisan sa ilang gihimong pakisusi kagahapon wala naman ang maong coal ash sanglit mawala ra kini sa bawod ug init.

Dili usab kini mamilit sa bisan asang dapit sa baybayon, bakhaw ug labaw sa tanan dili makadaot sa mga isda.

Ila na usab nga gipakigtagboan ang mga kadagkuan sa barko ug kompaniya nga gihatdan sa coal ash ug mga opisyales sa barangay. Mipasalig ang mga kompaniya nga nalambigit nga dili na kini masubli.

Giklaro ni Panaginip nga kanunay kini nilang himuon ang paglimpyo apan karon lang nahitabo nga adunay daghang coal ash ang miabot sa dagat. Una niini si Mayor Lakambini “Neneth” Reluya mipadayag sa iyang kabalaka human niya madawat ang report. Gani mihulga pa kining mokiha ug mangayog danyos kon si kinsa man ang responsabli.