Kamatayon sa mga bayani

Miulbo ang gubat sa Marawi niadtong Mayo 23 ug nagsige pa hangtod karong adlawa. Ang nangamatay ningkabat na ngadto sa 607 ka mga kinabuhi: 109 ka mga sundawo ug 453 sa mga teroristang Maute.

Ang uban mga sibilyan nga collateral damage sa gubat. Latest count kini ug mapun-an pa kay nagsige pa ang gubat. Gipasidunggan sa kagamhanan isip mga bayani ang mga sundawong nangamatay.

Patay na sila apan mabuhi sa atong kasaysayan kay handumon sa nasod nga kanunayng magpasidungog sa ilang kaisog. Wa mausik ang ilang kamatayon kay gitagik na sa atong balaang kagahapon.

Tulo ra ka mga katarungan nganong mabayani ang tawo: tawag sa katungdanan pagpanalipod sa nasod, pagluwas og mga kinabuhi nga kinasingkasing panahon sa katalagman ug kadtong nag-antos sa kaayuhan sa uban.

Si bisan kinsa nga nakahimo sa usa niini tawgog bayani. Siya mahimong di mapasidunggan ug makalimtan lamang. Kadaghan sa mga unsung hero nga wa mailhi bisan bayanihon ang ilang nabuhat.

Apan labing seguro naa sila sa paghandom sa mga linalang nga nahibawo sa ilang bayanihong kaagi. Ang mga mahal nila di gayud makalimot sa kanila ug maninguha nga siya pasidunggan sa katilingban.

Dako ba ang kabililhon sa usa ka bayani? Dako kaayo, matod pa sa akong higala. Kay ang bayani makadasig ug makatandog sa kinabuhi sa katilingban. Ehemplo siya sa pagpakabuhi.

Si Chief Justice Jose Abad Santos dihang patyunon sa mga Hapon didto sa iyang bilangguan misulti sa iyang anak”Di ko mosilbi sa mga Hapon kay gihigugma ko ang yuta kong natawhan ug tagsa ra ang tawo nga hatagag higayon nga patyon tungod sa iyang yutang natawhan.”

Ingon niini ang katarungan sa atong mga sundawo. Wa sila motalikod sa ilang katungdanan kay tagsa ra ang gihatagag higayon paglaban sa yutang natawhan. Mahimong modagan sila unta apan wa nila kini buhata.

Ang ilang kamatayon nagbukas og pagtulon-an sa tanang buhi. Ang tawo nga mahadlok sa pagbarog aron labanan ang katarong sama ra sa usa huyang nga sanga nga gupukon sa hangin.