Everytime you go
Nakadesisyon ko nga itingob ko sa akong studies ang akong hunahuna ug panahon. Kinahanglang makamove on ko sa pagpahilayo na sab ni Eldo nako. Usbon ko ang akong pagbati, gikan sa kaguol ngadto sa pagdawat sa reality nga si Eldo wa gyuy direksiyon ang kinabuhi. Apan wa kini magpasabot nga kalimtan ko siya. Bisag kanunay siyang nagpahilayo nako, apan wa mi magbuwag. Padayon ang among relasyon.
Di parehas sa mga unang pagpahilayo ni Eldo nako nga maghilak ko sa hilom, ning higayona wa ko na patuloi sa akong mga luha ang sitwasyon namong duha. Mogawas nga makaluluoy gyud ko kon sa matag pagpahilayo ni Eldo nako, pulos kaguol na lang ang akong bation. Kon way klase, mosuroy ko sa downtown o kaha sa uptown. Mag- window shopping ko sa mga Mall, motan-aw og sine, kining tanan akong gihimo aron paglingaw sa akong kaugalingon.
Epektibo ang akong gibuhat. Dali ra kong nakadawat sa kinaiya ni Eldo. Wa ko na sab hunahunaa ang dako kong gugma niya. Gihatagan kog kagawasan ang akong kaugalingon nga magmalipayon sa pagdawat sa akong mga admirer, ug usa na ani si Ronnie. Di kay si Ronnie ra ang nangulitawo nako, duna pay lain nga mga schoolmate nako.
“Can invite you for a dinner tonight, Jessica?” Usa ka Domingo nga nagkuyog mi si Ronnie sa pagpanimba sa Katedral, iya kong giimbetar. Every morning sa Sunday ko manimba. Diyosnon sab si Ronnie. Magsimbahan siya matag Domingo. Hapon siya mosimba. Pagkahibawo niya sa buntag sa Domingo ko magsimbahan, makigkuyog na siya nako sa pagpanimba.
Mao pay paggawas namo sa simbahan niadtong tungora.
“Hunahunaon ko pa na, Ron.”
Sukad, wa koy gikuyogan nga laing lalaki sa pagpangaon sa gawas. Si Eldo ra gyud ang akong gikuyogan nga kasagaran sa dinner. Siya man ang akong boyfriend, siya gyud ang akong ika- date. Gawas pa, dali ra man sab ming magkakontakay kay silingan man mi.
“Kanus-a ko mahibaw-i, Jes?”
Hinay ang among paglakaw ni Ronnie sa sidewalk samtang nagpaingon mi sa lugar nga among huwatanan og sakyanan para sa among pagpauli.
Naghunahuna ko. Why not? Di ba naka- adjust na man ko sa akong pagbati ug kaugalingon ning uwahing pagpahilayo na sab ni Edo nako? Gitando ko si Ronnie.