Child abuse

Dear Atty. Joan,

Ang among silingan hilig kaayo managmal sa iyang mga anak. Iyaha pa gyud kining pun-an ug pagpakauwaw ug pagbalikas sa mga bata. Dili siya mahadlok bisan ug nakakita kaming iyang mga silingan. Luoy kaayo ang mga bata.

Aduna ba mi mabuhat ani, Atty Joan, bisan pa ug dili namo sila kaliwat ug bisan ug siya ang inahan sa mga bata?

Angel

Dear Angel,

Daghang salamat sa imong pangutana, Angel. Oo, aduna kamoy mabuhat niini isip mga silingan.

Angayan nga inyong i- report ang panghitabo ngadto sa Barangay Council for the Protection of Children (BCPC) o di ba kaha sa GAD Focal person sa inyong barangay. Mahimo pod nga adto mismo sa kapulisan ninyo ireport kay kini usa ka salaod nga “child abuse” nga gisilutan ubos sa balaod.

Ang pagdisiplina sa mga bata dili dapat moresulta sa kadaot nga pisikal o sa kaisipan sa bata. Ang binuhatan sa kinsa man nga tao, ginikanan man o dili, nga moresulta sa maong kadaot mahimong mapasakahan ug kaso ubos sa Anti-Child Abuse Law o RA 7610. Sumala sa maong balaod, dili lamang ang biktima o iyang ginikanan o kaliwat ang mahimong mopasaka ug reklamo nga child abuse. Gani ang “concerned citizens”, dili mominos sa tulo kabuok, ang barangay kapitan, o ang mga social worker sa lugar kung asa nahitabo ang pag-abuso, bisan pa ug dili man dili sila kaliwat sa biktima, mamahimong mangunay sa pagpasaka ug reklamong child abuse.

Busa, ikaw, Angel, kauban ang duha pa ka concerned nga silingan, adunay mahimo dili lang sa pagreport, kundili mahimo pa gyud mong mangunay sa pagpasaka ug reklamo batok sa dagmalan nga silingan. Atty. Joan