Tama na, sobra na Peping

Taliwala sa panawagan sa pagpaluwat o pagpalagot ni Philippine Olympic Committee (POC) president Jose “Peping” Cojuangco, pabiling nagmabugnawon sa iyang emosyon si Philippine Sports Commission (PSC) chairman William “Butch” Ramirez.

Sa usa ka press conference niadtong Lunes pipila ka adlaw human sa Southeast Asian Games, si Ramirez mipasabot nga karon ang tukmang higayon nga maghiusa ang tanang sports agencies sa nasod aron kita makabangon sa bati natong performance sa 29th SEA Games.

Tiaw mo bay 24 ra ka gold medals ang nahagpat niini ug nalandig sa ikaunom nga puwesto nga maoy pinakaubos nga nakab-ot sa Pilipinas sukad niadtong 1999.

So, sakto si Ramirez nga angayan lang �yud maghiusa ta aron dili ta tantong mauwawan sa atong mga silingang nasod kay naapsan na gani ta sa Vietnam nga kon buot hunahunaon, uwahi ra kaayo na sila nato sa duyan kon ang natad sa paugnat sa kusog ang hisgutan.

Gani andam si Ramirez nga mopatunga tali sa mga nagbangi nga mga stakeholders sa nasod aron hapsayon ug uli-on ang tagsatagsa ka kabubut-on ug maghiusa alang sa kausbawan.

Good. Pero taym pa una. Mora man og way unity nga makab-ot kon anaa gihapon ni si Peping Cojuangco sa POC. Nakaupat na ni siya ka termino pero wa man tay nakita nga kausaban ug kahingusbawan.

Nagsigi na man hinuon og kaut-ot ang atong performance sa mga international competitions.

Dili kaha angay suportahan ning panawagan ni kanhi PSC chairman Dr. Aparicio “Perry” Mequi ug ni kasamtanang PSC commissioner Ramon Fernandez sa pagpalagpot ni Cojuangco? Enough is enough na, Sir Peping. Ihatag ang kahigayunan sa uban. You have nothing to prove na. After all, you’re still a Filipino and proud to be a Filipino.