Fil-German potensyal nga ma-No.1

Dili ikalimod nga dako ang posibilidad nga mahimong No.1 overall pick si Fil-German Christian Standhardinger sa umaabot nga Philippine Basketball Association (PBA) Rookie Draft.

Apan ang team nga makakuha niini nalantawang mag-atubang og mga kakulian sa umaabot.

Si Standhardinger nakatakdang mopirma og unom ka mga buwan nga kontrata aron moduwa sa Hong Kong Eastern Lions alang sa Asean Basketball League (ABL) ug Hong Kong A1 League.

Ang bag-ong season sa ABL mosugod karong Nobiyembre ug mahuman karong Marso. Nagpasabot kini nga dili puwedeng makaduwa si Standhardinger sa PBA hangtod karong Mayo o Hunyo, tungatungang bahin sa PBA

mid-season Commissioner's Cup conference.

Dili makaduwa ang 6'7” nga magduduwa sa kinatibuk-ang PBA All-Filipino Cup gawas lang seguro kon ang team nga makakuha kaniya andam mobayad sa kontrata niini sa Eastern Lions. “That’s the risk whichever team that will take Standhardinger in the draft faces,” matod ni PBA operations manager Rickie Santos.

“They should be willing to wait.”

Kini nga senaryo naagian na sa Alaska Aces dihang ilang gikuha si Don Allado ug hasta sa Purefoods Hotsdogs sa pagkuha niini kang Alvin Patrimonio sa rookie draft.

Niadtong higayuna, sila si Allado ug Patrimonio parehong aduna pa'y obligasyon sa team nga ilang gigikanan sa wala pa sila nakadesisyon nga manimpalad sa labing unang professional nga liga sa basketball sa Asya.

Si Standhardinger nakapakita og dakong potensyal dihang nagduwa siya sa duha ka teams sa Gilas Pilipinas nga ningkombati sa FIBA Asia Cup ug Southeast Asian Games.

Usa si Standhardinger sa Fil-foreigners nga nakaabot sa deadline aron magpalsta sa PBA Rookie Draft nga gikatakda karong Oktubre 29.

Mismong ang 6'7” nga magduduwa miangkon nga moduwa siya sa Eastern Lions sa ABL ug dili pa siya makapakita og aksyon sa PBA hangtod sa tungatungang bahin sa 2017-18 season.